Muheto Nshuti Divine wabaye Miss w’u Rwanda, n’umunyamakuru Sengabo Jean Bosco uzwi nka Fatakumavuta, bagejejwe ku Rukiko mu gitondo cya kare.
Aba bombi bamaze iminsi bari mu maboko y’inzego z’ubutabera, bakaba bagejewe ku Cyicaro cy’Urukiko rw’Ibanze rwa Kicukiro mu gitondo cyo kuri uyu wa Kane tariki 31 Ukwakira 2024, mu masaha ya saa moya, habura isaha n’igice ngo amasaha y’akazi agere.
Aba bombi bagejejwe ku Cyicaro ry’uru Rukiko bari mu modoka imwe y’Urwgeo rw’Igihugu rw’Ubugenzacyaha RIB, aho bagiye kuburanishwa ku ifunga n’ifungurwa by’agateganyo.
Miss Muheto ukurikiranyweho ibyaha bishingiye ku gutwara ikinyabiziga yonyoye ibisindisha birengeje igipimo akanangiza ibikorwa remezo, yageze ku Rukiko, yambaye imyambaro isanzwe, irimo ipantalo y’ibara rya pink n’agapira k’umukara yarengejeho ikote ry’umukara, anampate inkweto ndende n’amatararata y’umurimbo, ndetse anambaye amapingu.
Ni kimwe na Fatakumavuta na we yari yambaye imyambaro y’umukara, ipantalo ndetse n’umupira w’imbeho ndetse n’inkweto z’umweru.
Miss Muheto wagejejwe imbere y’Urukiko ngo asabirwe gukurikiranwa afunze, akurikiranyweho gutwara ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga agira, ndetse no kugonga no kwangiza ibikorwa remezo, hamwe no guhunga nyuma yo kugonga.
Ni mu gihe Fatakamumavuta akurikiranyweho icyaha cyo kubuza undi amahwemo hifashishijwe imbuga nkoranyambaga, icyo gukoresha imvugo ziremereye zikurura amacakubiri mu bantu, ndetse n’icyaha cyo gukoresha ibiyobyabwenge cyagaragaye nyuma ubwo yajyanwaga gusuzumwa bikagaragara ko mu mubiri we harimo ikiyobyabwenge cy’urumogi.
RADIOTV10
