Igisirikare giherutse guhirika ku butegetsi Perezida wa Niger, Mohamed Bazoum ubu unafungiye iwe, cyatangaje ko kigiye kumuburanisha ku byaha by’ubugambanyi bwo ku rwego rwo hejuru, no kuba intandaro y’umutekano mucye imbere mu Gihugu.
Mu itangazo ryasomwe kuri televiziyo y’Igihugu, Umuvugizi wa Gisirikare, Col-Maj Amadou Abdramane yavuze ko bamaze igihe bakusanya ibimenyetso kuri Perezida bahiritse, no ku bo bise ibyitso byo mu Gihugu no mu mahanga bye.
Ibi bitangajwe mu gihe imiryango mpuzamahanga itandukanye, irimo ishyira ku gitutu aba basirikare bahiritse ubutegetsi kubusubiza mu mahoro, kandi Perezida Bazoum agahita arekurwa nta yandi mananiza abayeho.
Mu minsi ishize baherutse gutangaza ko Mohamed Bazoum ashobora no kwicwa, mu gihe haba hari Ibihugu by’amahanga bigerageje kwivanga muri politike yo muri iki Gihugu cyo mu burengerazuba bwa Afurika.
Assoumani TWAHIRWA
RADIOTV10
