Perezida Évariste NDAYISHIMIYE w’u Burundi, yerecyeje muri Congo-Brazzaville mu muhango w’irahira rya Denis Sassou N’Guesso, wanitabiriwe na Perezida Paul Kagame w’u Rwanda.
Amakuru yatangajwe n’Ibiro by’Umukuru w’Igihugu mu Burundi kuri uyu wa Kane, avuga ko Ndayishimiye na we yafashe rutemikirere yerecyeza muri Repubulika ya Congo.
Iri tangazo ryashyizwe hanze n’Ibiro bishinzwe Itangazamakuru, Itumanaho n’Ubuvugizi bwa Perezida wa Repubulika, rivuga ko “ryifuza kumenyesha rubanda ko, Nyakubahwa Évariste NDAYISHIMIYE, Perezida wa Repubulika y’u Burundi akaba na Perezida w’Umuryango w’Ubumwe bwa Afurika, agiye mu rugendo yerekeza i Brazzaville ku ya 16 Mata.”
Ibi biro bishinzwe Itangazmakuru n’Itumanaho muri Perezidansi ya Repubulika y’u Burundi, rikomeza rivuga ko Ndayishimiye “Yitabiriye ibirori by’irahira rya Nyakubahwa Denis Sassou N’Guesso, watowe kuba Perezida wa Repubulika ya Congo.”
Ndayishimiye yerecyeje i Brazzaville nyuma y’amasaha macye, Umukuru w’Igihugu cy’u Rwanda, Paul Kagame na we agezeyo, aho yahageze ku mugoroba wo kuri uyu wa Gatatu.
Perezida Paul Kagame kandi yanahuye na mugenzi we wa Repubulika ya Congo, Denis Sassou N’Guesso ku mugoroba wo kuri uyu wa Gatatu, aho bagiranye ibiganiro byagarutse ku mubano usanzwe uhagaze neza hagati y’Ibihugu byombi.
RADIOTV10
