Polisi y’u Rwanda yasohoye itangazo rivuga ko irangisha amafaranga yatoraguwe kuri uyu wa Mbere tariki 20 Ukuboza 2021, isaba uwakumva ari aye kujya kuyashyikira yitwaje ibimenyetso.
Iri tangazo rya Polisi y’u Rwanda ryasohotse kuri uyu wa Kabiri tariki 21 Ukuboza 2021, rivuga ko aya amafaranga yatoraguwe mu Kigo Gisuzuzuma ubuziranenge bw’Ibinyabiziga giherereye i Remera mu Karere ka Gasabo.
Rivuga ko ayo mafaranga yatoraguwe mu mirongo ihagararamo abaje kwaka iyi serivisi yo gupimisha ubuziranenge bw’ibinyabiziga.
Rikagira riti “Uwakumva aya mafaranga ari aye yaza kuyafata muri iki kigo yitwaje ibimenyetso bigaragaza ko ari aye.”
Si ubwa mbere Polisi y’u Rwanda irangisha amafaranga kuko no mu mezi abiri ashize mu kwezi k’Ukwakira 2021, yari yarangishije amafaranga yatoraguwe mu kigo gisuzuma ubuziranenge bw’ibinyabiziga cya Huye.
Icyitonderwa: Ifoto iri hejuru yakuwe kuri Interineti ntaho ihuriye n’amafaranga avugwa mu nkuru
RADIOTV10
