Umunyarwenya ukomeye akaba anatanga ibiganiro mpuzamahanga kuri Televiziyo, Umunyamerika Steve Harvey uri mu Rwanda, yavuze ko yishimiye kwicarana na Perezida Paul Kagame bakagirana ibiganiro, akaba yamwigiyeho isomo ry’uburyo yicisha bugufi.
Steve Harvey uri mu ruzinduko mu Rwanda, yabitangaje nyuma yo guhura n’Umukuru w’u Rwanda, Paul Kagame bakanagirana ibiganiro.
Mu butumwa buherekeje ifoto ari kumwe na Perezida Kagame, Steve Harvey yagize ati “Nagize ibyishimo byo kwicarana no guhura na Nyakubahwa umuvandimwe wanjye Perezida Paul Kagame.”
Steve Harvey yakomeje agira ati “Namwigiyeho umuhate we no kwicisha bugufi. Gihamya yo kwigira no kwihangana k’u Rwanda ndetse no kubabarirana.”
Steve Harvey ni umwe mu banyarwenya bafite izina rikomeye ku Isi, akaba kandi ari umwe mu bafite ababakurikira benshi, byumwihariko ikiganiro cye The Steve Harvey gikundwa n’abatari bacye.
Uyu mugabo kandi akundirwa ubutumwa atanga, bubera interabugabo benshi, babufataho nk’ikitegererezo n’umuyobozi ubafasha kugira ibyo bageraho.
RADIOTV10
