Umunyamabanga Mukuru w’Ishyirahamwe ry’Umukino w’Amagare (FERWACY), ukurikiranyweho ibyaha birimo gufata icyemezo gishingiye ku itonesha, ubucuti, ikimenyane cyangwa icyenewabo, bivugwa ko yohereje umugore we mu butumwa nk’uri mu bahagarariye u Rwanda, yagejejwe imbere y’Urukiko abyisobanuraho.
Umunyamabanga w’Ishyirahamwe ry’Umukino w’Amagare (FERWACY), Munyankindi Benoit; yatawe muri yombi, tariki 21 Kanama 2023, akurikiranyweho ibyaha birimo icyo gufata icyemezo gishingiye ku itonesha, ubucuti, ikimenyane cyangwa icyenewabo.
Kuri uyu wa Kane tariki 07 Nzeri 2023, Ubushinjacyaha bwagejeje Munyankindi Benoit imbere y’Urukiko rw’Ibanze, kugira ngo aburane ku ifunga n’ifungurwa ry’agateganyo.
Ubushinjacyaha bwasabye Urukiko gufunga by’agateganyo uyu Munyamabanga Mukuru wa FERWACY, bwagaragaje impamvu zikomeye, buheraho bumusabira ko yafatirwa iki cyemezo.
Bwavuze ko Munyankindi Benoit yakoresheje ububasha bwe, agashyira umugore we Uwineza Providence ku rutonde rw’abagomba kujya mu irushanwa ryabereye muri Ecosse.
Ubushinjacyaha buvuga ko yagendeye ku marangamutima, agafahsa umugore we kujya muri iryo rushanwa agendeye ku bubasha afite, ndetse ko uwo mugore we yagiye nk’umwe mu bagiye bahagarariye u Rwanda, ngo kuko yagiye afite ikarita yanditseho ‘Official delegate’.
Ubushinjacyaha bwavugaga ko uyu Munyamabanga wa FERWACY yashakiye Visa umugore ndetse akagenda ari kuri urwo rutonde, nyamara ngo atari akwiye kugenda, bwasabye Urukiko kwemeza ko hari impamvu zikomeye zituma akekwaho gukora ibyaha akurikiranyweho, rukemeza ko afungwa by’agateganyo.
Uregwa waburanye ahakana ibyo ashinjwa, yavuze ko umugore we asanzwe afite ikipe ahagarariye ya Nyabihu, ndetse ko ari muri urwo rwego yagiye muri ririya rushanwa, kuko iyo kipe na yo yari ifite abakinnyi barigiyemo.
Munyankindi Benoit wavugaga ko Uwineza Providence [umugore we] yaragiye muri iryo rushanwa, yaragiye kureba urwego rw’abana b’ikipe yari ahagarariye no kwiga kugira ngo banitegure shampiyona y’Isi izabera mu Rwanda muri 2025.
Uregwa yavuze kandi ko hari n’inama yabereye i Musanze itegura iri rushanwa ryagiyemo Providence, aho byanavuzwe ko n’umuturage usanzwe, yemerewe kuba yaherekeza abakinnyi bari bagiye muri iryo rushanwa, kandi ko FERWACY yagombaga kumufasha.
Yavuze ko na Providence yafashijwe guhabwa ubutumire [invitation] na FERWACY, ubundi ibindi byose akabyishakira, kuko yishakiye Visa ndetse akaniyishyurira amafaranga y’urugendo.
Benoit wavugaga ko Providence adakwiye kurebwa mu ishusho y’umugore we muri uru rugendo, ahubwo ko yagakwiye gufatwa nk’uwari uhagariye ikipe yari ifite abakinnyi bagiye muri ririya rushanwa, yasabye Urukiko gufungurwa agakurikiranwa ari hanze.
Urukiko rw’Ibanze rwa Kicukiro, rwahise rupfundikira uru rubanza ku ifunga n’ifungurwa ry’agateganyo, ruvuga ko ruzasomwa umwanzuro warwo mu cyumweru gitaha tariki 12 Nzeri 2023.
RADIOTV10
