Semana Kevin uzwi ku izina rya Ish Kevin, umwe mu baraperi bagezweho mu Rwanda, yashinze inzu itunganya umuziki, yinjira mu bashoramari ba muzika nyarwanda.
Iyi Studio ya Ish Kevin yiswe Trappish Records, yahise inasinyisha abahanzi babiri, bagiye gutangirana na yo mu kubafasha mu bikorwa byabo bya muzika.
Uyu muhanzi wamaze kuba umushoramari, yabwiye RADIOTV10 ko gushinga inzu itunganya umuziki, byahoze biri mu nzozi ze, none akaba yishimiye kuba azikabije.
Avuga kandi ko uretse kuba na we azajya akoresha iyi studio mu gutunganya ibihangano bye, izajya inakorera abandi bahanzi nyarwanda, mu rwego rwo guteza imbere umuziki w’abana b’u Rwanda.
Iyi studio ya Trappish Records iherereye mu Murenge wa Kacyiru mu Karere ka Gasabo mu Mujyi wa Kigali, aho imirimo yo kuyitunganya isa nk’iri gusozwa.
Ish Kevin uri mu baraperi nyarwanda bagezweho, akunze gushyira hanze ibihangano bikundwa na benshi biganjemo urubyiruko, akaba aheruka gushyira hanze iyo yise Full Stop yakoranye na Juno Kizigenza na we ufite abakunzi benshi.
Khamiss SANGO
RADIOTV10
