Banki Nkuru y’u Rwanda yatangaje ko umuvuduko w’izamuka ry’ibiciro mu Gihugu wazamutse ukagera kuri 9,2% mu mwaka w’ingengo y’imari wa 2025-2026, uvuye kuri 5,7% wariho mu mwaka wawubanjirije wa 2024-2025.
Ibi bigaragazwa na raporo ya Banki Nkuru y’u Rwanda yashyizwe hanze kuri uyu wa Gatatu tariki 11 Ugushyingo 2026.
Iyi Raporo igaragaza ko umuvuduko w’izamuka ry’ibiciro ritabarirwamo ibiribwa byangirika vuba n’ibikomoka ku ngufu wageze kuri 9,7%, uvuye kuri 5,6% mu mwaka w’ingengo y’imari wabanje.
Ku rundi ruhande, izamuka ry’ibiciro by’ibikomoka ku ngufu ryihuse cyane, rigera kuri 20,6% rivuye kuri 1,5% mu mwaka wa 2024/25.
Ibi byatumye nubwo izamuka ry’ibiciro by’ibiribwa byangirika vuba ryagabanutse rikagera kuri 4,9%, rivuye kuri 7,5% mu mwaka wabanje, umuvuduko rusange w’izamuka ry’ibiciro ukomeza kwiyongera.
BNR ivuga ko kimwe mu byatumye ibiciro bizamuka ari impinduka z’ibiciro byashyizweho mu gice cya kabiri cy’umwaka wa 2025, ndetse n’ingaruka z’intambara yo mu Burasirazuba bwo Hagati ku itwarwa ry’ibikomoka ku ngufu.
Ibi byagize ingaruka ku biciro by’ibikomoka kuri peteroli ku isoko ry’u Rwanda, binagira uruhare mu izamuka ry’ibiciro by’ubwikorezi mu gice cya mbere cy’umwaka wa 2026.
BNR iteganya ko ibiciro bizakomeza kuzamuka
Banki Nkuru y’u Rwanda iteganya ko mu mwaka wa 2026 umuvuduko w’izamuka ry’ibiciro uzakomeza kuba hejuru y’imbago ngenderwaho zayo ziri hagati ya 2% na 8%.
Iyi banki ivuga ko bishobora gufata igihe mbere y’uko izamuka ry’ibiciro ritangira kugabanuka buhoro buhoro, aho biteganyijwe ko rizongera gusubira mu mbago ngenderwaho mu gice cya kabiri cy’umwaka wa 2027.
Gusa, igaragaza ko hari ibyago bishobora gutuma ibiciro bizamuka kurushaho ugereranyije n’uko byari byitezwe.
Mu bishobora kugira uruhare muri ibyo, harimo ingaruka z’imihindagurikire y’ikirere zifitanye isano na El Niño, zishobora kugabanya umusaruro w’ubuhinzi, cyane cyane mu gihe ibiciro by’ifumbire na byo bikomeje kuzamuka.
Ibi bishobora gutuma umusaruro w’ibiribwa ugabanuka, bigakurura izamuka ry’ibiciro byabyo ku masoko yo mu gihugu.
Ikindi ni uko intambara yo mu Burasirazuba bwo Hagati ishobora gukomeza kugira ingaruka ku biciro by’ibikomoka kuri peteroli n’ibiribwa ku rwego mpuzamahanga, bikagira n’ingaruka ku bindi bicuruzwa na serivisi mu Rwanda.
BNR ivuga ko izakomeza gukurikiranira hafi uko ubukungu buhagaze ku rwego mpuzamahanga no mu gihugu, ku bufatanye n’izindi nzego za Leta, kugira ngo ifate ingamba zikwiye zo kugabanya umuvuduko w’izamuka ry’ibiciro no kuwugarura mu mbago ngenderwaho.
Ubukungu bw’u Rwanda bwazamutseho 10,6%
Nubwo umuvuduko w’izamuka ry’ibiciro wakomeje kwiyongera, raporo ya BNR igaragaza ko ubukungu bw’u Rwanda bwagize iterambere rikomeye mu mwaka w’ingengo y’imari wa 2025-2026.
Umusaruro mbumbe w’igihugu (GDP) wazamutseho 10,6%, uvuye kuri 6,3% mu mwaka w’ingengo y’imari wa 2024-2025.
Ibi byatewe n’izamuka ry’ibikenerwa imbere mu gihugu, ishoramari ryiyongereye ndetse n’iterambere ry’inzego zitandukanye zigize ubukungu.
Urwego rwa serivisi rwateye imbere bitewe n’ubucuruzi, ubwikorezi, ikoranabuhanga mu itangazabumenyi n’itumanaho, serivisi z’imari ndetse n’ibikorwa by’inzego za Leta.
Mu buhinzi, iterambere ryaturutse ku musaruro w’ibihingwa byoherezwa mu mahanga, amafi ndetse n’umusaruro ushimishije w’ibihingwa by’ibiribwa.
Urwego rw’inganda na rwo rwagize iterambere rikomeye, ahanini bitewe n’ubucukuzi bw’amabuye y’agaciro bwungukiye ku izamuka ry’ibiciro ku masoko mpuzamahanga no ku bwiyongere bw’amabuye y’agaciro yoherezwa mu mahanga.
Raporo inagaragaza ko ishoramari rya Leta n’abikorera mu bikorwa remezo ryagize uruhare mu kuzamura ibikorwa by’ubwubatsi, mu gihe iterambere ry’inganda ryashingiye ahanini ku gutunganya ibiribwa no gukora ibikoresho by’ubwubatsi.
RADIOTV10