Umuyobozi Mukuru wa Polisi y’u Rwanda, CG Felix Namuhoranye yakiriye Abofisiye Bakuru baturuka mu Bihugu icyenda bagiye kurangiza amasomo mu Ishuri Rikuru rya Polisi (NPC) ryo mu Karere ka Musanze, abasaba kuzakomeza kurangwa n’ubutwari bagaragaje mu gihe bamaze biga muri iri shuri.
Ni igikorwa cyabaye mu mpera z’ciyumweru twaraye dusoje ku wa Gatandatu tariki 14 Kamena 2025, ku cyicaro Gikuru cy’iri Shuri.
Aba Bofisiye Bakuru barangije amasomo mu cyiciro cya 13 cy’amasomo ajyanye n’ubuyobozi (Police Senior Command and Staff Course), bakiriwe ku meza bari kumwe n’imiryango yabo muri uyu musangiro warimo n’abandi bayobozi bakuru muri Polisi y’u Rwanda.
Aba Bofisiye Bakuru bagiye kurangiza amasomo muri iri shuri, bakomoka mu Bihugu icyenda birimo u Rwanda rwakiriye aya masomo, Botswana, Kenya, Lesotho, Malawi, Namibia, Repubulika ya Santrafurika, Somalia, na Sudani y’Epfo.
IGP Felix Namuhoranye yashimiye aba Bofisiye Bakuru ku bw’umuhate n’umurava byabaranze muri iki gihe cy’umwaka bamaze biga muri iri shuri, abasaba gukomeza kurangwa na byo.
Yagize ati “Mukomeze kugira ubutwari n’ubwitange nk’uko mwabigaragaje muri hano, mwifashisha ubumenyi mwungutse mu kuzana impinduka mu mutekano n’iterambere birambye aho muzaba mukorera hose.”
CP Rafiki Mujiji, Umuyobozi w’ishuri rikuru rya Polisi, na we yashimiye aba Bofisiye Bakuru bagiye gusoza amasomo yabo, ku bw’imyitwarire myiza n’ubushobozi bagaragaje, abasaba kuzashyira mu bikorwa ubumenyi bungukiye muri iri shuri bamazemo igihe cy’umwaka.
Mu gihe cy’umwaka umwe bamara biga, ba ofisiye bakuru mu nzego zishinzwe iyubahirizwa ry’amategeko, bahabwa amasomo akubiye mu byiciro bitandukanye birimo amasomo y’icyiciro cya gatatu cya Kaminuza (Masters) mu bijyanye n’amahoro no gukemura amakimbirane, ubumenyi ku miyoborere, n’ayerekeranye n’ibikorwa byo kubungabunga amahoro.
Ni gahunda igamije kubongerera ubumenyi n’ubushobozi mu bijyanye no kuyobora, gutegura ibikorwa by’umutekano n’imikorere ya Polisi igezweho mu gukemura ibibazo by’umutekano no kurwanya ibyaha byambukiranya imipaka himakazwa amahoro n’umutekano mu Karere, ku mugabane no ku isi muri rusange.
RADIOTV10
