Umwaka uruzuye hadutse akaga k’intambara yabaye urusobe rw’ibibazo bimaze guhitana abarenga ibihumbi 40, Israel na Hamas bitangiye intambara yagiye ihindura isura uko ibihe byagiye biha ibindi. Iyi ntambara yadutse ubwo Hamas yasaga nk’ikoze mu jisho Israel ikayigabaho igitero gitunguranye, kuva ubwo icumu ntirunamurwa. Twibukiranye bimwe mu byaranze iyi ntambara.
Indirimbo y’agahinda n’ihumure ku babuze ababo n’ibyabo tariki indwi 2023, ni yo yaririmwe. Kuri iyi tariki Hamas yinjiye muri Israel n’amasasu abisikana n’ijambo Allahu Akbar ihitana abaturage 1 200 inashimuta abandi 251.
Kuri uyu munsi Guverinoma ya Netanyahu yarateranye; ibendera rirururutswa; bazirikana abahasize ubuzima n’abakiri mu biganza bya Hamas ibazengurukana mu myobo yo muri Gaza.
Perezida wa Israel, Isaac Herzog yavuze ko uyu munsi utagomba kwibagirana mu mateka y’Isi, ndetse asaba amahanga gufasha iki Gihugu kugera ku ntego zacyo.
Yagize ati “Italiki 7 Ukwakira 2023; ni umunsi utazibagirana kuri njye, iki ni igikomere ku kiremwamuntu. Isi yose igomba kumenya ko kugira ngo igere ku mahoro arambye ari uko yafasha Israel guhangana n’abanzi bayo.”
Hagati ya tariki nk’iyi y’umwaka wa 2023 kugeza uyu munsi; hasimburanye ibihe bikomeye kuri Israel, byanatumye kugeza magingo aya iki Gihugu kirutwa n’u Rwanda mu bunini, ubu gihanganye n’impande esheshatu.
Iyi ntambara yafashe indi sura ttaliki 08 Ukwakira 2023 ubwo Israel yagabaga igitero muri Gaza cyo kwihimura kuri Hamas no kugarura ku ngufu abaturage batwaye bugwate.
Iki ni igikorwa Leta Zunze Ubumwe za Amerika zari zishyigikiye mu buryo bweruye.
Mu ijoro ryabanjirije icyo gitero; Perezida Joe Biden akikijwe na Visi Perezida Kamala Harris na Minisitiri w’Ububanyi n’Amahanga Anthony Blinken, yavuze ko Igihugu cye cyifatanyije na Israel.
Icyo gihe yagize ati “Abana bato bishwe bari kwishimira amahoro. Muri uyu mwanya ndashimangira ko twifatanyije na Israel. Tugomba gukora ibishoboka byose kugira ngo Israel irinde abaturage bayo. Nta mpamvu n’imwe ishobora kuba intandaro y’iterabwoba. Hamas ntabwo ikora mu nyungu z’abaturage ba Palestine, ahubwo igamije gusiba Leta ya Israel no kurimbura Abayahudi bose.”
Kuri uwo munsi inyeshyamba zo muri Liban zitwa Hezballah na zo zahise zigaba ibitero mu majyaruguru ya Israel, bihita bituma Israel irwanira mu majyaruguru no mu burengerazuba.
Ku itariki 04 Mata 2024 Israel yagabye ibitero muri Syria. Kuri 13 Mata 2024; Iran yarashe muri Israel ibisasu 300, bimwe byavuye muri Yemen na Syria, urugamba ruba ruragutse.
Ku wa 31 Nyakanga 2024, Israel yishe Ismail Haniyeh wayoboraga Hamas mu rwego rwa politike, imwiciwe muri Iran.
Uko ibyo bihe byakomezaga gusimburana; Irana na yo yakomeje kuvuga ko izihorera.
Minisitiri w’intebe wa Irael Benjamin Netanyahu ubwo yari mu Nteko Rusange y’Umuryango w’Abibumbye; yatanze ubwo butumwa.
Yagize ati “Mfite ubutumwa bugenewe abanyagitugu b’i Tehran; nimuturasaho; natwe tuzabarasa, Nta hantu na hamwe muri Iran ukoboko twa Irsael kutabasha kugera, ibyo ni uko bimeze muri aka karere kose. Ntitukiri intama zishorerwa zijyanwa mu ibagiro. Mfite n’ubundi butumwa ku bantu bateraniye aha n’abari hanze bose; turi gutsinda.”
Intero ya Iran ni na yo yo muri Lebanon. Umuyobozi wa Hezballah, Hassan Nasrallah ku italiki 19 Nzeri 2024 yishimiye aho bari bageze bihagararaho.
Yari yagize ati “Ndabwira Netanyahu na Gallant; bagamije kuduhungabanya; ndetse na Guverinoma n’igisirikare, intambara yo muri Gaza nidahagarara; Intambara ku gace kegereye Liban na yo ntizahagarara. Tumaze amezi 11 tubisubiramo, ariko muri ayo mezi 11 ashize; nta na kimwe barageraho mu byo biyemeje.”
Icyakora iryo ni ryo jambo rya nyuma Nasrallah yavuze; kuko ku itariki 27 Nzeri 2024 Minisitiri w’Intenbe Netanyahu yatanze itegeko ryo kumuhitana.
Nyuma y’iminsi ine, Iran yarashe ibisasu 200 bikaze kuri Israel. Icyakora Israel yitonze gusubiza.
Muri iyi ntambara imaze umwaka; amahanga yacitsemo ibice, ndetse bigera ubwo Urukiko Mpuzamahanga Mpanabyaha rushyiriraho Netanyahu impapuro zo kumuta muri yombi, icyakora kugeza n’ubu avuga ko zitazigera zimuca intege.
Aho yagize ati “Abakora ibyaha by’intambara ntabwo baba muri Israel, bibera muri Iran, Gaza, Syria, Liban na Yemen. Abashyigikiye abo banyabyaha, abashyigikiye sekibi, umwaku aho gushyigikira umugisha; ababikora mwese bigomba kubatera ipfunwe.”
Mu gushaka iherezo ry’iyi ntamabara; amahanga akomeje gushyira igitutu kuri Israel ngo ishyire intwaro hasi yemere inzira y’ibiganiro. Uri imbere muri iryo tsinda; ni Perezida w’u Bufaransa, Emmanuel Macron Ndetse aherutse gusaba ko Abanyaburayi bahagarika intwaro zoherezwa muri Israel.
Uyu nawe Netanyahu yamuhaye ubutumwa agira ati “Mfite ubutumwa bugenewe Perezida Macron; ubu duganyanye n’imitwe irindwi, ariko Perezida Macron n’abandi barasaba ko Israel yafatirwa ibihano ku ntwaro. Iran yo yabifatiye Hezbollah, Houthis na Hamas? Ihuriro ry’abagizi ba nabi rirashyigikiranye. Reka mbabwire ikintu kimwe; Israel izatsinda ifite ubufasha bwanyu cyangwa itabufite, ariko buzakorwa n’ikimwaro umunsi tuzaba twatsinze.”
Nyuma y’uyu mwaka Israel iri mu ntambara n’imitwe ishyigikiwe na Iran; i Tel Aviv bashimangira ko intego ari guhashya Hezaballah na Hamas, ndetse bakiga neza no ku myitwarire ya Iran.
David NZABONIMPA
RADIOTV10
