Ubushyamirane bwahuje umusirikare mu gisirikare cya Repubulika Iharanira Demokarasi ya Congo (FARDC) n’abarwanyi b’umutwe wa Wazalendo muri Gurupoma ya Luberike muri Teritwari ya Walikare mu Ntara ya Kivu ya Ruguru, bwasize abarwanyi batatu bapfuye.
Ubu bushyamirane bwabaye kuri uyu wa Kabiri tariki 10 Werurwe, i Mungazi, muri Gurupoma ya Luberike, aho abapfuye bose uko ari batatu, ari abarwanyi ba Wazalendo.
Nk’uko amakuru aturuka muri aka gace abivuga, iki ubu bushyamirane bwaturutse ku bwumvikane bucye hagati y’umusirikare n’itsinda ry’abarwanyi ba Wazalendo aho babanje kujya impaka ku ngingo itaramenyekana.
Muri iyi mirwano, umusirikare yarashe abarwanyi ba Wazalendo ahita yicamo batatu. Amakuru avuga ko ibi byamenyekanye nyuma y’amasaha make bibaye nyuma yuko humvikanye urusaku rw’amasasu muri ako gace rwanateye ubwoba mu baturage bo muri ako gace.
Ukekwaho kuba yarashe, yatawe muri yombi na bagenzi be kandi, ubu akaba ari mu maboko y’abayobozi ba gisirikare kugira ngo abibazwe.
Aba barwanyi batatu ba Wazalendo bashyinguwe muri iki gitondo cyo kuri uyu wa Gatatu mu gace kamwe. Abasirikare ba FARDC n’abarwanyi ba Wazalendo bakunze gukozanyaho mu bushyamirane bubahuza, aho muri 2025, habaye ubundi bubiri hagati y’abasirikare i Mungazi bwasize hari abahaguye abandi bagakomereka.
RADIOTV10
