Indege ya Sosiyete ya Canada (Air Canada) yagonganiye n’imodoka ku kibuga cy’Indege cya LaGuardia i New York muri Leta Zunze Ubumwe za America, abantu babiri bahita bahasiga ubuzima, abandi benshi barakomereka.
Amakuru dukesha ibinyamakuru binyuranye birimo CNN na ABC, avuga ko iyi mpanuka y’indege yagonganye n’imodoka, yatumye ingendo z’indege zihagarara kuri iki kibuga cy’Indege.
Iyi mpanuka y’indege ya Air Canada yagonganye n’imodoka, yabaye kuri uyu wa Mbere tariki 23 Werurwe 2026.
Umupilote ndetse na mugenzi we bafatanya mu gutwara indege, bahise bahasiga ubuzima nk’uko bitangazwa n’ibinyamakuru binyuranye birimo CNN na ABC.
ABC itangaza ko abantu 13 bakomeretse bahise bajyanwa mu bitaro, barimo 11 bari abagenzi bari muri iyi ndege, ndetse na babiri bari muri iyo modoka byagonganye.
Nk’uko byatangajwe n’umuvugizi w’ishami rya Polisi y’i New York rishinzwe kuzimya inkongi z’umuriro, yavuze ko bihutiye kugera ahabereye iyi mpanuka yahise itera inkongi y’umuriro “batangira gutanga ubutabazi bwo kuzimya umuriro wari wafashe indege n’imodoka ku kibuga cy’indege.”
Polisi y’i New York yatangarije AFP ko indege ya Air Canada “yagonganye n’imwe mu modoka z’ikigo gishinzwe ibyambu.”
Amashusho yashyizwe hanze na AFP agaragaza indege ya Air Canada mu gihe cy’ijoro iri ku kibuga cy’indege, igice cyayo cy’imbere cyangiritse cyane, ndetse n’imodoka nyinshi z’ubutabazi ziyikikije.
RADIOTV10
