Abantu 17 bapfuye mu mpanuka y’indege yabereye mu Mujyi wa Kenge, mu majyepfo ashyira uburengerazuba bwa Repubulika Iharanira Demokarasi ya Congo, nk’uko byatangajwe n’Umunyamabanga wungirije wa Guverineri w’Intara ya Kwango. Mu bapfuye harimo abasirikare 13 barimo Abajenerali babi ba FARDC.
Abapfuye barimo abasirikare 13, muri bo abajenerali babiri, ndetse n’abasivili bane, harimo n’umwana.
Ubuyobozi bwatangaje ko imirambo y’abahitanywe n’iyi mpanuka yakuwe aho indege yakoze impanuka n’abapolisi, nyuma y’uko umuriro wari watse ku ndege uzimye.
Mu itangazo ryasohowe n’Ingabo za RDC (FARDC), zatangaje ko abajenerali babiri ndetse n’abandi bari bagize itsinda ryari kumwe na bo n’abagize abakozi b’indege bapfuye.
Aba basirikare n’abandi bari kumwe na bo bari bavuye mu butumwa bw’akazi bari bagiyemo i Kikwit, mu Ntara ya Kwilu ituranye na Kwango.
Guverinoma y’Intara ya Kwango yatangaje ko inzego z’umutekano ndetse n’abatekinisiye bashinzwe gukora iperereza ku mpanuka, kugira ngo hamenyekane icyayiteye n’uko yabaye.
Izo nzego kandi zahawe inshingano zo kurinda ahabereye impanuka, kubungabunga ibimenyetso bishobora gufasha mu iperereza ndetse no gufasha mu kumenya neza abahitanywe na yo.
Kajugujugu yaturutse i Kinshasa yageze i Kenge, mu gihe itsinda ry’abashinzwe iperereza ryari ritegerejwe kuhagera.
Ubuyobozi bw’Intara ya Kwango bwatangaje ko kugeza ubu agakoresho kabika amakuru y’indege (black box) kataraboneka.
Iyi mpanuka yabereye mu Mujyi wa Kenge, umurwa mukuru w’Intara ya Kwango, kuri uyu wa Gatanu.
Kugeza ku mugoroba w’uwo munsi, icyateye impanuka nticyari cyamenyekana, mu gihe iperereza ryari rigitangira.
RADIOTV10