Ikipe ya RSSB Tigers yasoreje ku mwanya wa kane mu irushanwa rya FIBA Intercontinental Cup 2026, nyuma yo gutsindwa na Boca Juniors yo muri Argentine amanota 93-62 mu mukino wo guhatanira umwanya wa gatatu wabereye kuri National Indoor Stadium i Beijing mu Bushinwa.
Boca Juniors yatangiye neza umukino, itsinda agace ka mbere 26-18, mbere yo kongera ikinyuranyo mu gace ka kabiri ikagatsindamo amanota 26-11. Igice cya mbere cyarangiye iri imbere ku manota 52-29. Mu gice cya kabiri, RSSB Tigers ntiyabashije guhindura isura y’umukino, Boca Juniors ikomeza kuyobora kugeza ku musozo.
Osborn Shema ni we watsinze amanota menshi ku ruhande rwa RSSB Tigers, aho yatsinze amanota 11, mu gihe Agustín Barreiro wa Boca Juniors yayoboye umukino n’amanota 24. Boca kandi yarushije Tigers cyane mu ma-rebounds, aho yagize 64 kuri 29 za Tigers.
RSSB Tigers yari yageze muri iri rushanwa nyuma yo kwegukana Basketball Africa League (BAL) 2026, bityo ihagararira Afurika muri FIBA Intercontinental Cup. Ni bwo bwa mbere ikipe yo mu Rwanda yitabiriye iri rushanwa.
Mu mikino yo mu itsinda, Tigers yatangiye itsindwa na Rytas Vilnius yo muri Lithuania amanota 107-89, ariko iza gukora comeback ikomeye itsinda Shanghai Sharks 117-115, ivuye inyuma ku kinyuranyo cy’amanota 19. Iyi ntsinzi yayihesheje umwanya wa kabiri mu itsinda A binayiha amahirwe yo gukomeza muri ½.
Muri ½, RSSB Tigers yatsinzwe na NBA G League Unitedamanota 114-95, mbere yo guhura na Boca Juniors mu mukino wo guhatanira umwanya wa gatatu.
Iri rushanwa ryitabiriwe n’amakipe atandatu arimo Rytas Vilnius yo muri Lithuania, Shanghai Sharks na Beijing Royal Fighters byo mu Bushinwa, RSSB Tigers yo mu Rwanda, Boca Juniors yo muri Argentine na NBA G League United yo muri Leta Zunze Ubumwe za Amerika.
RSSB Tigers isize amateka yo kuba ikipe ya mbere yo mu Rwanda yageze muri ½ cya FIBA Intercontinental Cup, ndetse ikaba isoje iri rushanwa iri mu makipe ane ya mbere ku Isi.
Sosthene NKURUNZIZA
RADIOTV10