Imirwano yamaze iminsi ibiri hagati y’Igisirikare cya Repubulika Iharanira Demokarasi ya Congo (FARDC) n’umutwe wa Wazalendo mu gace ka Uvira mu Ntara ya Kivu y’Epfo, byemejwe ko yahitanye abantu 11.
Aya makuru yatangajwe nyuma yuko kuri uyu wa Kabiri tariki 25 Ugushyingo 2025 habonetse agahenge, nyuma y’iminsi ibiri y’imirwano yari ihanganishije FARDC na Wazalendo.
Amakuru aturuka mu Mujyi wa Uvira kandi avuga ko n’ibikorwa byari byahagaze kubera iyi mirwano, byongeye gufungura imiryango, nyuma y’ubwoba bwinshi kubera urusaku rw’amasasu.
Ni imirwano yari ihanganishije FARDC n’abambari bayo ba Wazalendo, basanzwe bakorana mu rugamba rwo guhangana n’Ihuriro AFC/M23 rirwanya ubutegetsi bwa DRC.
Radio Okapi, itangaza ko abantu icyenda bahise bahasiga ubuzima ku Cyumweru, mu gihe abandi babiri bari bakomeretse, ariko abandi babiri bakaza kwitaba Imana ku wa Mbere.
Amakuru avuga ko muri aba basize ubuzima muri iriya mirwano, barimo abasirikare mu ngabo za Leta, ndetse n’abarwanyi b’umutwe wa Wazalendo, hakaba n’abasivile barashwe amasasu yaraswaga n’impande zombi.
Imirwano ikomeje guhanganisha FARDC n’uyu mutwe wa Wazalendo, ishinze imizi ku makimbirane, ashingiye ku kuba impande zombi zirwanira ubuyobozi muri Uvira.
Bamwe mu barwanyi b’umutwe wa Wazalendo bavugwaho gusuzugura amabwiriza atangwa na FARDC, isanzwe ifite ubwo bubasha mu rugamba bafatanyamo rwo guhangana na AFC/M23.
RADIOTV10
