Ubuyobozi bw’Umujyi wa Kigali bwatangaje ko hagiye gutangira imirimo yo kubaka ikiraro cyo mu kirere mu muhanda wa Prince House-Giporoso-Ku Cyamitsingi, butangaza impinduka z’agateganyo zizakurikizwa mu mikoreshereze y’uyu muhanda.
Mu itangazo ryashyizwe ahagaragara, Umujyi wa Kigali wavuze ko izi mpinduka zizatangira mu ijoro ryo kuri uyu wa 02 rishyira ku wa 03 Ugushyingo 2026, guhera saa sita z’ijoro (00h00), kugira ngo imirimo yo kubaka ikiraro ibashe gutangira.
Ubuyobozi bwagize buti “Ubuyobozi bw’Umujyi wa Kigali buramenyesha abakoresha umuhanda wa Prince House-Giporoso-Ku Cyamitsingi ko guhera mu ijoro ryo ku wa 02 rishyira ku wa 03 Ugushyingo 2026, saa 24h00, habaho impinduka z’agateganyo mu mikoreshereze y’uyu muhanda, kugira ngo hatangire imirimo yo kubaka ikiraro.”
Mu mpinduka zizakorwa, ibinyabiziga bizajya binyura ku mpande z’umuhanda usanzwe ukoreshwa mu gice cya Prince House-Giporoso-Ku Cyamitsingi, mu gihe hazaba hakorwa imirimo yo kubaka ikiraro.
Umujyi wa Kigali kandi watangaje ko umuhanda mushya wa Koridoro uzajya ukoreshwa mu cyerekezo kimwe gusa, kigana ku Kibuga cy’Indege Mpuzamahanga cya Kigali.
Ku bashaka gukoresha indi mihanda, ubuyobozi bwagaragaje ko bashobora kunyura mu muhanda wa Mushumba Mwiza-Kimironko cyangwa uwa Alpha Palace-Kabeza.
Ubuyobozi bw’Umujyi wa Kigali bwasabye abakoresha uyu muhanda gukurikiza amabwiriza azajya atangwa n’inzego zishinzwe kuyobora ibinyabiziga aho imirimo izaba ikorerwa.
Bwagize buti “Abakoresha umuhanda barasabwa kubahiriza ibyapa n’amabwiriza y’abapolisi bashinzwe umutekano wo mu muhanda n’abandi bashinzwe kuyobora ibinyabiziga aho imirimo iri gukorerwa.”
Abakoresha uyu muhanda barasabwa guteganya igihe gihagije mu ngendo zabo no kwitondera impinduka zizaba zashyizweho, mu gihe imirimo yo kubaka ikiraro izaba ikomeje.
Uyu muhanda wa Prince House-Giporoso-Ku Cyamitsingi ni kimwe mu bice by’umushinga w’umuhanda Prince House-Cyamitsingi-Masaka umaze amezi abiri utangiye kubakwa no kwagurwa.
Uyu mushinga watangiye ku wa 30 Kanama 2026, ukazamara amezi 30. Uzashyirwa mu bikorwa na Guverinoma y’u Rwanda ibinyujije muri Minisiteri y’Ibikorwa Remezo (MININFRA) n’Ikigo gishinzwe Iterambere rya Transport (RTDA), ku bufatanye na Guverinoma y’u Bushinwa.
Umuhanda uzagurwa ukaba umuhanda w’ibisate bine by’ibinyabiziga, hakubakwa ibiraro binyura hejuru y’indi mihanda ndetse n’inzira zinyura munsi y’imihanda, mu rwego rwo koroshya urujya n’uruza rw’ibinyabiziga.
RADIOTV10