Mu mikino y’akarere ka gatanu (Zone 5) izasiga hamenyekanye azitabira imikino Nyafurika mu cyiciro cy’abagore izabera Dakar muri Senegal, amakipe ahagarariye u Rwanda akomeje kwitwara neza.
Muri iyi mikino yatangaiye tariki 27 Ukwakira 2024 muri Zanzibar, u ruhagarariwe n’amakipe nka APR WBBC na REG WBBC.
Aya makipe ahagarariye u Rwanda ararangiza imikino yayo kuri uyu wa Kabiri tariki 29 Ukwakira 2024, aho nka APR WBBC iza guhura na Hawassa City Basketball Club, mu giye REG WBBC yo ihura na Gladiators y’i Burundi.
Aya makipe y’u Rwanda yombi yitwaye neza mu mikino yabanje mu matsinda aho REG W BBC (iri mu itsinda C), ifite igikombe cya shampiyona ya 2024, yatsinze imikino yayo uko ari ibiri (Fox Divas 105-48 & Equity 86-73).
Ni mu gihe APR WBBC yatwaye igikombe cy’Igihugu kizwi nka ‘Rwanda Cup 2024’, yo iri mu itsinda B, na yo yatsinze KPA amanota 96-76.
Mu gihe aya makipe yombi ahagarariye u Rwanda yakwitwara neza, byayiha gusoza ayoboye amatsinda aherereyemo.
Amakipe abiri ya mbere muri aya marushanwa azabona itike yo kuzahagararira akarere ka 5, mu mikino yo ku rwego rwa Afurika (2024 Africa Women’s Basketball League), iteganyijwe kuzabera i Dakar muri Senegal, kuva tariki 6-15 Ukuboza 2024.
Jean Claude KANYIZO
RADIOTV10
