Guverinoma ya Repubulika Iharanira Demokarasi ya Congo, yakiriye icyiciro cya mbere cya doze ibihumbi 100 by’inkingo z’indwara y’ubushita bw’inkende, izwi nka Mpox, imaze kugaragara mu Bihugu 12 byo ku Mugabane wa Afurika.
Izi doze 100 000 zoherejwe muri Repubulika Iharanira Demokarasi ya Congo, ku bufatanye n’abaterankunga bo mu Bihugu byo mu burengerazuba bw’isi, barimo Umuryango w’Ubumwe bw’u Burayi na Leta Zunze Ubumwe za America, biyemeje gutanga doze 380 000 by’inkingo za Mpox.
Izi zatanzwe binyujijwe mu kigo cy’ubuzima gishinzwe ubutabazi mu muryango w’Ubumwe bw’Uburayi, kizwi nka HERA. Biteganyijwe ko, icyiciro cya kabiri cy’izi nkingo kizagera muri Congo mu mpera z’iki cyumweru turi gusoza.
Avugana n’itangazamakuru ku kibuga cy’indege, Umuyobozi Mukuru wa HERA (Ikigo cy’ubuzima gishinzwe ubutabazi mu muryango w’Ubumwe bw’u Burayi), Laurent Muschel, yavuze ko ibi biri gukorwa hashingiwe ku mpuruza iherutse gutangwa n’ikigo Nyafurika gishinzwe kurwanya indwara z’ibyorezo, Africa CDC, n’Umuryango w’Abibumbye.
Ati “uyu munsi twagejeje doze 100 000 z’urukingo rwa Mpox muri Congo, zageze ku kibuga cy’indege 12:10. Indi ndege izagera muri Congo ku wa Gatandatu, nabwo ijyanye izindi dose 100 000, ku masaha nk’ayo. Ibi bivuze ko, zose hamwe ari doze 200 000, zagenewe Repubulika Iharanira Demokarasi ya Congo, mu rwego rwo guhangana n’ikibazo cya Mpox.”
Yashimangiye ko “ibi byose bikozwe nyuma y’ibyumweru bibiri gusa, Africa CDC n’ishami ry’Umuryango w’Abibumbye ryita ku buzima OMS, batangaje ko iyi ndwara yamaze guhinduka ikibazo mpuzamahanga kibangamiye ubuzima.”
Nubwo Repubulika Iharanira Demokarasi ya Congo ihawe izi nkiko, ariko ibinyamakuru bitandukanye birimo na The Africa News dukesha iyi nkuru, biravuga ko izi doze 200 000 z’inkingo ari agatonyanga mu Nyanja, kuko Guverinoma ya Congo yo igaragaza ko ikeneye nibura doze miliyoni eshatu y’inkingo, ibihita bituma izi doze 200 000, zingana na 15% y’izikenewe zose.
Ni indwara yamaze kuba ikibazo cyugarije umugabane wa Afurika wose, kuko mu cyumweru gishize abantu bashya basaga 22,800 banduye iyi ndwara y’ubushita bw’inkende. Abasaga 622 bahitanywe n’iyi ndwara kuri uyu mugabane, kandi ubushakashatsi bugaragaza ko irimo yandura ku muvuduko uri hejuru 200%, buri cyumweru.
Assoumani TWAHIRWA
RADIOTV10
