Guverinoma ya Repubulika Iharanira Demokarasi ya Congo, yatangaje havumbuwe imirambo y’abantu 20, bikekwa ko biciwe mu bice bya Kivu ya Ruguru, byagenzurwaga n’umutwe wa ADF ukunze kwica abaturage benshi.
Iyi mirambo yavumbuwe mu cyumweru gishize mu gice cyahoze kiri mu maboko y’umutwe w’inyeshyamba za ADF zikomoka mu gihugu cya Uganda, zikaba zishamikiye kuri Leta ya Kisilamu, ariko kandi uyu mutwe ukaba ufite ibirindiro mu mashyamba ya Congo mu gice cy’Amajyaruguru y’Igihugu.
Uyu mutwe zwiho ibikorwa by’ubugizi bwa nabi, ukora ubinyujije mu bitero udasiba kugaba ku baturage b’inzirakarengane.
Kugeza kuri uyu wa Mbere, Leta yari yamaze kohereza itsinda ry’ingabo na Polisi muri ako gace, riherekeje abaganga bazobereye mu bucukumbuzi bwifashisha ibimenyetso, mu rwego rwo kumenya isano n’imyirondoro by’aba baturage bishwe mu mpera z’icyumweru gishize.
Assoumani TWAHIRWA
RADIOTV10
