Umuhanzi Gabiro Gilbert uzwi nka Gabiro Guitar, ari mu byishimo nyuma yuko Urukiko rutesheje agaciro ikirego yaregwamo na Kompanyi yamwishyuzaga Miliyoni 10,8 Frw.
Nk’uko byagaragajwe n’uyu muhanzi ubwe, bigaragara ko ari ikirego yari yarezwemo na EVOLVE MUSIC GROUP LTD bahoze bakorana mu buryo bwo kumurikiranira ibikorwa bya muzika.
Inyandiko mvugo y’icyemezo cy’Urukiko rw’Ubucuruzi rwari rwaregewe uru rubanza, cyafashwe kuri uyu wa Gatatu tariki 16 Ukwakira 2024, ivuga ko rwasanze ikirego cy’iyi kompanyi kidafite ishingiro, rukemeza ko Gabiro nta mwenda ayibereyemo.
Mu butumwa uyu muhanzi yanyujije ku mbuga nkoranyambaga, kuri uyu wa Kane tariki 17 Ukwakira 2024 agaragaza ko yishimiye icyemezo cy’Urukiko, yagize ati “Mbyukanye Ibyishimo bidasanzwe nyuma y’icyasha Rukundo Gilbert (EVOLVE Music Group) yanteje ancira akobo, gusa Imana ntirenganya.”
Imiterere y’ikibazo
Nk’uko bigaragazwa n’inyandiko zagaragajwe n’uyu muhanzi, bigaragara ko yari yarezwe na Kompanyi EVOLVE MUSIC GROUP LTD yavugaga ko yakoranaga na yo ndetse akaba yarigeze kuyibera umunyamigabane ayifatanyije n’uwitwa MUHATURUKUNDO Gilbert.
Aba bombi bashinze iyi sosiyete muri 2021 aho buri umwe yagombaga gutanga imari shingiro ya miliyoni 5 Frw, ubundi bombi buri umwe akagira imigabane ingana na 50%.
Inyandiko y’Inzu itanga ubufasha mu by’amategeko ya Lex One Law Firm, ikomeza ivuga Gabiro yavuye muri iyi sosiyete muri 2022 amaze kugurisha imigabane ye yose, ariko ntiyishyura imari shingiro ya miliyoni 5 Frw.
Izi miliyoni kimwe n’imyenda ya RRA ya miliyoni zirenga 2 Frw ngo yaje kuba kuri iyi sosiyete bitewe no kuba Gabiro atarishyuye ariya mafaranga Miliyoni 5 Frw, ndetse n’ibindi byose hamwe bifite agaciro kangana na 5 850 000 Frw by’ibikorwa yakorewe n’iyi sosiyete birimo kwamamaza, atigeze yishyura.
Iyi nyandiko y’inzu yunganiraga iriya Kompanyi, igira iti “Dushingiye ku byo tumaze gusobanura hejuru, turagusaba kwishyura umwenda unganana na 10 850 000 Frw ubereyemo EVOLVE MUSIC GROUP LIMITED mu gihe kitarenze iminsi 7 uhereye none ku wa 07/01/2024 cyangwa se ukegera EVOLVE MUSIC GROUP LIMITED mukumvikana uko uzishyura uwo mwenda.”
Ikomeza igira iti “Mu gihe iyo minsi yashira ntacyo ukoze, turakumenysha ko EVOLVE MUSIC GROUP LIMITED izitabaza inkiko kugira ngo irenganurwe, kandi mu byo EVOLVE MUSIC GROUP LIMITED izaregera harimo inyungu kuri uwo mwenda wishyuzwa zizabarwa hashingiwe ku bipimo bya BNR.”
Gabiro Guitar wigeze guhagararira u Rwanda mu marushanwa ya muzika azwi nka Tusker Project Fame, yamamaye mu ndirimbo zinyuranye zirimo izo yahereyeho nka ‘Byakubera byiza’, ndetse n’izindi amaze ashyira hanze mu bihe bya vuba nk’iyo yakorana na Comfy yitwa ‘Igikwe’.
Kate Gustave NKURUNZIZA
RADIOTV10
