Japhet, umunyarwenya uri mu bagize itsinda ryamamaye nka ‘Bigomba Guhinduka’ yasekeje abitabiriye igitaramo cyabereye i Lagos, bataha bikanda imbavu.
Mazimpaka Japhet yatumiwe muri iki gitaramo yakoreye i Lagos nyuma yuko akoreye igitaramo i Kigali cyari kitabiriwe n’abanyarwenya bo muri Nigeria, bagakunda ibihangano bye.
Muri iki gitaramo cyabereye i Lagos muri Nigeria cyabaye mu ijoro ryacyeye ryo ku ya 15 Werurwe 2023 kizwi nka JJC (Jokes, Jabs, Chill) yari yahuriyemo n’abandi banyarwenya b’i Lagos.
Uyu munyarwenya ni we wa mbere ukomoka hanze ya Nigeria witabiriye iki gitaramo gisanzwe kibera i Lagos kigategurwa n’umunyarwenya Olu Salako wamenyekanye nka SLK.
Mu rwenya yahaye abantu, yifashishije ibyanditswe muri bibiliya, asoza arenzaho amagambo yo gushyenga yasekeje abari bitabiriye iki gitaramo bose bahise bamukomera amashyi bakanazamura akamo.
Japhet usanzwe ari mu banyarwenya bagezweho banakunzwe mu Rwanda, avuga ko yishimiye uburyo yakiriwe muri Nigeria n’uburyo urwenya rwe rwakunzwe.
Khamiss SANGO
RADIOTV10
