Abasirikare bakuru mu gisirikare cya Repubulika Iharanira Demokarasi ya Congo (FARDC) barimo Abajenerali 31 n’Aba-Colonel batandatu baherutse guhamagazwa n’Ubushinjacyaha bukuru bwa Gisirikare mu iperereza rijyanye no ku gutsindwa na AFC/M23 kuva iri Huriro ryafata Bunagana muri 2022.
Umuvugizi w’Igisirikare cya DRC (FARDC), Maj Gen Sylvain Ekenge; yatangaje ko uku guhamagazwa kw’aba basirikare kwakozwe n’Ubushinjacyaha Bukuru bwa Gisirikare, ari ibintu bisanzwe mu Gisirikare.
Ni iperereza ririho rikorwa ku basirikare bakuru bose bari bafite inshingano ubwo Umutwe wa M23 wakubitaga inshuro abasirikare ba FARDC, kuva wafata Umujyi wa Bunagana muri Kamena 2022.
Iri perereza ryakozwe uhereye ku bari bayoboye urugamba kugeza ku wari Umugaba Mukuru wa FARDC mu bikorwa bya gisirikare bya Sokola 2 muri Kivu ya Ruguru.
Abakorwaho perereza kandi rigera ku bari abagaba b’Ingabo zirwanira ku Butaka, uwari Umugaba w’Ingabo zirwanira mu mazi n’uw’Ingabo zo mu kirere, kimwe n’uwari ushinzwe ibikorwa bya gisirikare muri zone ya gatatu, n’uwari ukuriye ubutegetsi bwa gisirikare mu Ntara ya Kivu ya Ruguru.
Umuvugizi wa FARDC, Maj Gen Sylvain Ekenge yavuze ko ihamagazwa ryakorewe bariya basirikare bakuru, ryari rigamije “Gutanga ibisobanuro ku nshingano za buri musirikare mukuru muri ziriya ngaruka ziremereye zabayeho ku rugamba no ku rwego rwa gisirikare.”
Hatangajwe kandi ko abo basirikare bakuru bafunzwe, mu gihe Ubushinjacyaha Bukuru bwa gisirikare buriho bukorana n’Ubugenzuzi Bukuru bwa Gisirikare mu rwego rwo gushaka uburyo bazoherezwa muri gereza zitandukanye.
RADIOTV10
