Perezida Kagame yakiriye abarimo Umuyobozi Mukuru wa Kaminuza y’ubukombe muri Korea y’Epfo

Perezida Paul Kagame yakiriye mu Biro bye, abarimo Prof. Dong-Sup Yoon usanzwe ari Perezida wa Yonsei University, Kaminuza yo muri Korea y’Epfo.

Ni igikorwa cyabaye ku gicamunsi cyo uyu wa Kabiri tariki 27 Mutarama 2026 nk’uko byatangajwe n’Ibiro by’Umukuru w’Igihugu cy’u Rwanda.

Ubutumwa bwatanzwe na Perezidansi ya Repubulika y’u Rwanda buvuga ko “muri iki gicamunsi muri Village Urugwiro, Perezida Kagame yakiriye Prof. Dong-Sup Yoon, Perezida wa Yonsei University, Dr. Won-Yong Lee, Visi Perezida ushinzwe Ubushakashatsi, ndetse n’itsinda ryabo.”

Ibiro by’Umukuru w’u Rwanda, bitangaza ko aba bayobozi b’iriya Kaminuza na Perezida Paul Kagame, bagiranye “ibiganiro byibanze ku guteza imbere imikoranire ya Yonsei University n’u Rwanda binyuze mu gusangizanya ubumenyi, ubushakashatsi no kubaka ubushobozi mu burezi.”

Iyi Kaminuza ya Yonsei University, ni Ishuri Rikuru rishingiye ku myemerere ya Gikirisitu, ryashinzwe mu 1885, rikaba ifite icyicaro Gikuru Cyaryo i Seul muri Korea y’Epfo.

RADIOTV10