Ikipe ya Rayon Sports y’abagore ikomeje kwitegura imikino ya Afurika inagura abakinnyi bazayifasha kuzayitwaramo neza, aho ubu yaguze umunyezamu w’Ikipe y’Igihugu ya Kenya, wabaye umunyezamu mwiza inshuro eshatu muri Shampiyona yo muri Kenya, wanakiniye ikipe Buja City y’i Burundi.
Monica Karambu wakiniraga Thika Queens FC yo muri Kenya ndetse akaba anakinira ikipe y’igihugu ya Kenya, yasinyiye Rayon Sports WFC kuri uyu wa Gatatu tariki 10 Nyakanga 2024.
Mu butumwa bwatangajwe n’Ubuyobozi bwa Rayon Sports WFC, buvuga ko uyu munyezamu yanabaye umunyezamu mwiza muri Shampiyona y’abagore muri kenya mu myaka inyuranye y’imikino nk’uwa 2020, uwa 2021 ndetse n’uwa 2023.
Ubuyobozi bwa Rayon bugira buti “Yamaze gutangira imyitozo, kandi azitabira imikino y’amajonjora ya Champions League CECAFA y’abagore.”
Uyu munyezamu wakiniye amakipe anyuranye muri Afurika y’Iburasirazuba nka Buja City yo mu Burundi, yaje yiyongera ku bandi bakinnyi baherutse kugurwa na Rayon Sports WFC yitegura kuzahagararira u Rwanda mu mikino Nyafurika CAF Champions League.
Mu bo iherutse kugura, barimo umunyezamu Ndakimana Angeline waturutse muri AS Kigali WFC, uzajya asimburanwa n’uyu Munya-Kenyakazi.
Rayon Sports WFC igiye guhagararira u Rwanda CAF Champions League izabera muri Ethiopia, nyuma y’uko yegukanye igikombe cya Shampiyona ya 2023-2024.
Jean Claude KANYIZO
RADIOTV10
