Umuhanzi The Ben n’umukunzi we Uwicyeza Pamella bemeranyijwe kuzashyingiranwa nk’umugore n’umugabo, bamaze gusinya amasezerano yo kwamamaza kompanyi ya Gorilla Games y’imikino y’amahirwe.
Uyu muhango wo gushyira umukono ku masezerano wabaye kuri uyu wa Gatanu tariki 19 Kanama 2022.
Mugisha Benjamin AKA The Ben umaze iminsi ari mu Rwanda, we n’umukunzi we Miss Pamella, bahise babona akazi ko kwamamaza iyi kompanyi ya Gorilla Games iri mu zikomeye mu Rwanda zitanga ubucuruzi bw’imikino y’amahirwe.
Gorilla Games yagize The Ben na Miss Uwicyeza Pamella kuyibera abazajya bayamamaza (Brand Ambassadors), ifite uburyo bw’ikoranabuhanga bwo gukina imikino yo gutega.
Uyu muhanzi n’umukunzi we bahise batangirira ku kwamamaza poromosiyo ya Gorilla Games y’igikombe cy’Isi kizabera muri Qatar mu mpera z’uyu mwaka.
Aya masezerano azatwara hafi miliyoni 150Frw, azatuma abanyamahirwe batatu babasha kujya kureba umukino wa nyuma w’igikombe cy’Isi muri Qatar.
The Ben waje mu Rwanda aje gutaramira abaturarwanda mu gitaramo kiswe Rwanda Rebirth Celebration, agiye kuzuza umwaka yambitse impeta uyu mukunzi we Pamalla akamusaba kuzamubera umugore, aho iki gikorwa cyabereye mu birwa bya Maldives tariki 17 Ukwakira 2021.
Benshi mu bakunzi b’imikino yo gutega, bemeza ko iyi kompanyi yabashyize igorora kuko yazanye uburyo bworoshye kandi bwizewe bwatuma bitabira iyi mikino baba bakoresheje telefone isanzwe, iya smartphone ndetse n’uburyo bwo kuri internet.
RADIOTV10
