Mirundi Joseph Tamale wigeze kuba Umuvugizi wa Perezida Yoweri Kaguta Museveni wa Uganda, ubu akaba yari umusesenguzi mu bya Politiki, yitabye Imana ku myaka 60 azize uburwayi yari amaranye iminsi.
Uyu munyapolitiki wari warabaye umusesenguzi ukomeye wa Politiki ya Uganda ndetse n’akarere, yitabye Imana mu masaha akuze yo mu ijoro ryacyeye ahagana saa tanu (23:00’) kuri uyu wa Kabiri tariki 13 Kanama 2024, aho yari amaze ukwezi arwariye mu bitaro bya Kisubi i Kampala ari na ho yitabiye Imana.
Amakuru yatangajwe n’umuryango we, avuga ko abaganga bemeje ko ibihaha bye byari byarajemo amazi, gusa ku Cyumweru no ku wa Mbere yari atangiye gusa n’uworoherwa.
Nyakwigendera Mirundi Tamale wari uzwiho kutaripfana, yabaye Umuvugizi wa Perezida Yoweri Museveni, waje kumukura kuri izi nshingano muri Nyakanga 2015.
Yanabaye kandi Umujyanama mukuru wa Perezida Yoweri Kaguta Museveni wari ushinzwe itangazamakuru, akaba yari umwe mu basesenguzi ariko bagaruka ku bigwi bya Museveni cyane.
Olive YAMBABARIYE
RADIOTV10