Umuvugizi Wungirije wa AFC/M23, Dr Balinda Oscar yatangaje ko hari abasirikare b’abakomando b’iri huriro bari hafi ya Kisangani, bagaba ibitero byo kujya kuburizamo imigambi ya FARDC iba iri gucurwa, bagahita basubira mu birindiro byabo.
Ni nyuma yuko iri huriro ryemeje ko abasirikare baryo bari hafi y’Umujyi wa Kisangani baherutse kujya gushwanyaguza drones za FARDC ziba ziri gutegurwa ngo zigabe ibitero mu birindiro bya AFC/M23 no mu bice bituwemo n’abaturage bigenzurwa n’iri huriro.
Dr Oscar Balinda, Umuvugizi Wungirije wa AFC/M23; avuga ko nyuma yo kubona ko i Kisangani ari ho hagizwe igicumbi n’uruhande bahanganye cyo guteguriramo ibitero, abasirikare b’iri huriro bajya kuburizamo iyo migambi.
Yagize ati “AFC-M23 ifite amatsinda y’abakomando ajya hafi ya Kisangani, akagaba ibitero bigamije kuburizamo umugambi wo guhungabanya ibice igenzura.”
Yatangaje ko aba basirikare badasanzwe ari bo banaherutse gukora igikorwa cya gisirikare cyo gusenya biriya bikoresho bya FARDC biba bigiye gukoreshwa mu kugaba ibitero.
Ati “Ingabo z’abakomando zigenda amanywa n’ijoro, zijya gukora akazi zarangiza zikagaruka. Rero baragiye barakora, barangije baragaruka.”
Dr Balinda avuga ko bashaka kurandura ibi bikorwa bibi bikorwa n’uruhande bahanganye, bityo banabashe gusubukura ibiganiro bihuza iri huriro na Leta ya Congo.
Ati “Iryo terabwoba ni ryo dushaka guhagirika kugira ngo twubahirize agahenge, dusubire ku meza y’ibiganiro, tugere ku mahoro arambye.”
Iri huriro rya AFC/M23 riherutse gupfusha uwari umuvugizi w’igisirikare cyaryo, wishwe arasiwe hafi ya Rubaya mu bitero by’indege zitagira abapilote za FARDC, riherutse gutangaza ko uru ruhande bahanganye rukomeje kwica inzirakarengane n’abasirikare baryo, ariko ko ridashobora gukomeza kubirebera.
RADIOTV10
