Minisitiri w’Ingabo wa Israel, Israel Katz arashinja Iran kurenga ku gahenge kari katangajwe, ategeka igisirikare gutegura ibitero simusiga kuri Iran bahanganye.
Ni nyuma yuko aka gahenge kari katangajwe ndetse kemewe na Guverinoma ya Israel nyuma yuko ibisabwe na Perezida wa Leta Zunze Ubumwe za America, Donal Trump.
Iran na yo yari yatangaje ko yemeye aka gahenge, ariko Minisitiri w’Ingabo wa Israel, Israel Katz yatangaje ko iki Gihugu bahanganye cyakarenzeho.
Iran yo irahakana ibi ishinjwa na Israel byo kurenga ku guhagarika imirwano, ahubwo igasaba igisirikare cyayo kuryamira amajanja kugira ngo gisubize ibitero byose bishobora kugabwa na Israel.
Nubwo Iran ihakana ibi byo kurenga ku gahenge, amakuru avuga ko mu gitondo cya kare kuri uyu wa Kabiri, igisirikare cyayo cyohereje ibindi bisasu bya misile kuri Israel bikica abantu bane mu majyepfo y’Umujyi wa Beersheba.
Ni nyuma yuko kandi kuri uyu wa Mbere Iran yari yagabye igitero ku kigo cy’Igisirikare cya Leta Zunze Ubumwe za America kiri muri Qatar, mu kwihorero ku bitero iki Gihugu giherutse kuyigabaho ku Cyumweru.
Iran iravuga ko abantu 400 barimo abana 13 bamaze gutakaza ubuzima, mu gihe abandi 3 056 bakomeretse kuva Israel yatangira kugaba ibitero kuri Iran tariki 13 Kamena 2025, mu gihe Israel yo imaze gutakaza abantu 24 bahitanywe n’ibitero bya Iran.
RADIOTV10
