Umugore w’imyaka 33 y’amavuko ukurikiranyweho kwica umugabo we w’imyaka 34 babanaga mu Murenge wa Gishubi mu karere ka Gisagara, mu ibazwa rye; yabwiye ubushinjacyaha ko nyakwigendera ari we wabanje kumukubita urushyi ubwo bari bavuye gusangira inzoga mu kabari, na we akamukubita agafuni agahita apfa.
Uyu mugore akurikiranywe n’Ubushinjacyaha ku Rwego Rwisumbuye rwa Huye rwakiriye dosiye y’ikirego aregwamo muri iki cyumweru, kugira ngo ruzayiregera Urukiko Rwisumbuye rwa Huye.
Ni dosiye iregwamo umugore w’imyaka 33 y’amavuko, ukurikiranyweho kwica umugabo we w’imyaka 34, aho icyaha akekwaho cyabaye mu ijoro ryo ku ya 28 z’ukwezi gushize k’Ugushyingo 2024.
Ibi byabereye mu Mudugudu wa Mwiba mu Kagari ka Nyabitare, Umurenge wa Gishubi mu karere ka Gisagara, nyuma yuko nyakwigendera n’umugore we bari babanje gusangira inzoga.
Ubushinjacyaha bugira buti “Mu ibazwa rye, uregwa avuga ko yari yasangiye n’umugabo we inzoga mu kabari, bagera mu rugo nijoro bagatongana; umugabo akamukubita urushyi na we agafata agafuni akakamubita mu musaya.”
ICYO ITEGEKO RITEGANYA
Icyaha kiregwa uyu mugore, nikiramuka kimuhamye, azahanishwa igifungo cya burundu nk’uko biyteganywa n’ingingo ya 107 y’ Itegeko no 68/2018 ryo ku wa 30/08/2018 riteganya ibyaha n’ibihano muri rusange nk’uko ryavuguruwe kugeza ubu.
Iyi ngingo ifite umutwe ugira uti “Ubwicanyi buturutse ku bushake n’uko buhanwa” ivuga ko “Umuntu wica undi abishaka, aba akoze icyaha. Iyo abihamijwe n’urukiko, ahanishwa igihano cy’igifungo cya burundu.”
RADIOTV10
