Minisitiri w’Ububanyi n’Amahanga wa Israel, Gideon Saar, yagiriye uruzinduko muri Somaliland, nyuma yo kwemeza nk’Igihugu cyigenga iyi Ntara yo muri Somalia, ibintu bitanyuze iki Gihugu.
Israel ni cyo Gihugu cyonyine kimaze kwemera ku mugaragaro icyemezo cya Somaliland cyo kwitandukanya na Somalia.
Gusa Somalia yo yatangaje ko icyo cyemezo cya Israel cyo kuyemera nk’igihugu kinyuranyije n’amategeko, inavuga ko uruzinduko rwa Saar ari uguhonyora bikomeye ubusugire bw’igihugu cyayo, no kwivanga mu bibazo byayo mu buryo butemewe.
Mu itangazo yashyize ku rubuga rwa X, Saar yavuze ko yagiranye ibiganiro na Perezida wa Somaliland, Abdirahman Mohammed Abdullah, “byibanze ku nzego zose z’imibanire.”
Saar yagize ati: “Twiyemeje guteza imbere ku buryo bufatika umubano hagati ya Israel na Somaliland.”
Saar kandi yavuze ko Perezida Abdullah wa Somaliland yemeye ubutumire bwa Minisitiri w’Intebe Benjamin Netanyahu bwo kugirira uruzinduko rwemewe muri Israel.
Mu kwezi gushize ni bwo Perezida Abdullahi yavuze ko Somaliland izinjira mu masezerano azwi nka Abraham Accords, yashyizweho na Washington mu 2020, yahaye amahirwe ibihugu byo mu Kigobe nka Leta Zunze Ubumwe z’Abarabu (UAE), umufatanyabikorwa wa hafi wa Somaliland, ndetse na Bahrain, kugirana umubano wa dipolomasi na Israel.
Abinyujije ku mbuga nkoranyambaga ze, Perezida wa Somaliland yashimiye Israel n’abaturage bayo ku cyemezo bafashe cyo kwemera Somaliland nk’igihugu kigenga, anavuga ko iki cyemezo kizagira ingaruka nziza ku bukungu n’iterambere rya Somaliland.
Shemsa UWIMANA
RADIOTV10
