Nyuma y’igihe gito ahawe kuba umutoza mukuru w’agateganyo wa AS Kigali, Jimmy Mulisa yahise asubiza igitambaro cya Kapiteni, Haruna Niyonzima wagihoranye mbere y’uko asubira muri Young Africans yo muri Tanzania.
Haruna Niyonzima asubiranye uyu mwambaro wa Kapiteni muri AS Kigali mu gihe kuva yayigarukamo atari ari no muri batatu ba mbere bashobora kuwambara.
Uyu mwambaro wari ufitwe na Bishira Latif ubu wamaze gusubizwa Haruna nyuma y’Igihe gito ikipe ya AS Kigali ihawe gutozwa by’agateganyo na Jimmy Mulisa.
Eric Nshimiyimana yirukanywe ku wa Gatandatu w’icyumweru gishize, ku Cyumweru tariki ya 19 Ukuboza ubuyobozi bwa AS Kigali buhita bwemeza Jimmy Mulisa nk’umutoza w’agateganyo.
Mu nama yakoranye n’abakinnyi, yababwiye ko yaganiriye na Bishira Latif na we yemera kurekura iki gitambaro nta kibazo na kimwe na kimwe yabigizeho cyane ko nk’uko amakuru abivuga na mbere yigeze gushaka kukimuha ariko abatoza ntibabyemere.
RADIOTV10
