Nyuma y’imirwano ikomeye hagati y’umutwe wa M23 n’igisirikare cya Repubulija Iharanira Demokarasi ya Congo (FARDC), biravugwa ko iki gisirikare cyisubije agace ka Masisi-Centre kari gaherutse kubohozwa na M23.
Aya makuru yatangajwe kuri uyu wa Kane tariki 09 Mutarama 2025 nyuma yuko kuri uyu wa Gatatu hiriwe hari imirwano ikomeye hagati ya M23 na FARDC ifatanyije n’umutwe w’inyeshyamba wa Wazalendo.
Ni nyuma yuko M23 yagenzuraga agace ka Masisi-Centre kuva tariki 04 Mutarama 2025, nyuma yo kwamurura FARDC n’abambari bayo, ndetse uyu mutwe ukaba waranafashe Lokaritse ya Katale na Lushebere.
Amakuru aturuka ahari kubera uru rugamba, aravuga ko igisirikare cya Congo kisubije aka gace ndetse abasirikare bacyo bakaba basubiye mu birindiro bahozemo mbere yo kubyirukanwamo na M23.
Ibikorwa bikomeye nk’ahakorera ubuyobozi bwa Teritwari, kimwe n’Ibitaro Bikuru bya Masisi-Centre, biravugwa ko ubu biri kugenzurwa na FARDC ndetse bikaba biri kwakira inkomere nyinshi zakomerekeye ku rugamba.
Umuvugizi w’umutwe wa Wazalendo, Héritier Baraka; mu kiganiro yagiranye na RFI, yemeje ifatwa rya Masisi-Centre, aho yavuze ko iki gikorwa bakigezeho nyuma y’urugamba ruremereye.
Yagize ati “Twagabye ibitero ku barwanyi ba M23 kandi twisubije Centre ya Masisi, Lushebere, Kahangle.”
Uyu muvugizi wa Wazalendo, yavuze ko bakomeje ibitero bigamije kwisubiza ibindi bice byose byigaruriwe na M23 birimo n’ibyo imaranye imyaka irenga ibiri.
Kwisubiza aka gace ka Masisi, bibaye nyuma yuko imiryango mpuzamahanga irimo uw’Ubumwe bw’u Burayi wamaganye kuba M23 yari yafashe aka gace, ndetse usaba uyu mutwe gusubira inyuma byihuse.
Ni mu gihe ubuyobozi bwa M23 bwo butabikozwaga, ndetse buvuga ko abamagana kuba bafashe aka gace, hari ibyo birengagije, nko kuba batibuka ko abafashe aka gace ari Abanyekongo ndetse gasanzwe ari iwabo wa benshi bo mu miryango y’abagize uyu mutwe.
RADIOTV10
