Madamu Jeannette Kagame yakiriye bamwe mu bakobwa begukanye ikamba rya nyampinga w’u Rwanda n’ibisonga byabo, abagira inama yo kurushaho kugira amahitamo meza azatuma bavamo ababyeyi babereye u Rwanda.
Madamu Jeannette Kagame yakiriye aba ba Nyampinga ku mugoroba wo kuri uyu wa Kane tariki 28 Mata 2022.
Yakiriye abarimo Miss Rwanda 2022, Nshuti Muheto Divine, Miss Ingabire Grace ufite ikamba rya 2021, Nishimwe Naomie wa 2020, Nimwiza Meghan-Miss 2019, Iradukunda Liliane-Miss 2018, Iradukunda Elsa-Miss 2012, Mutesi Jolly-Miss 2016.
Mu bandi bakiriwe na Madamu Jeannette Kagame, harimo ababaye ibisonga ndetse n’abegukanye amakamba atandukanye nka Uwimana Jeannette wegukanya ikamba ry’umukobwa ufite umushinga w’agashya muri Miss Rwanda 2022, hakabamo Miss Kayumba Dorina wabaye igisonga cya mbere muri 2022, Keza Maolithia wabaye igisonga cya kabiri cya Miss 2022, Miss Mugabekazi Ndahiro Queen wabaye Miss Photogenic muri Miss Rwanda 2022 ndetse na Saro Amanda wabaye Miss Talent.
Mu butumwa yahaye aba bakobwa, Madamu Jeannette Kagame, yasabye aba bakobwa gukomeza guharanira no kwitwararika mu mahitamo bakora uyu munsi n’ejo hazaza kuko ari yo azabafasha kugera ku byo Igihugu kibifuzamo.
Yagize ati “Nshuti mwitabiriye Miss Rwanda, turabizi ko iki ari cyo gihe cyanyu, mu rwego rwo kuzavamo ababyeyi n’abakobwa beza, tugomba guhora tuzirikana ko ibeyemezo dufata uyu munsi n’ejo hazaza bigomba kuba byiza kandi amahitamo yacu akazaba ari yo atugira abanyembaraga.”
Madamu Jeannette Kagame yabwiye aba bakobwa ko Igihugu kibizeye mu gukomeza guhangana n’ibibazo bibugarije hano hanze.
Madamu Jeannette Kagame ahuye n’aba ba Nyampinga mu gihe hamaze iminsi hakekwa ko bamwe muri bo bahuye n’ikibazo cy’ihohoterwa rishingiye ku gitsina aho byanatumye Ishimwe Dieudonne utegura irushanwa rya Miss Rwanda atabwa muri yombi aho akurikiranyweho ibyaha bifitanye isano n’iki kibazo.
Bamwe mu bakobwa bakekwa ko bakorewe iri hohoterwa, harimo Miss Nshuti Muheto Divine wegukanye ikamba ry’uyu mwaka.
RADIOTV10
