Ishimwe Dieudonne uzwi nka Prince Kid uherutse gufatirwa icyemezo cyo gufungwa by’agateganyo, akakijuririra, yageze mu Rukiko Rwisumbuye rwa Nyarugenge kuburana ubujurire bwe, Urukiko rwemeza ko na bwo buburanishwa mu muhezo.
Ishimwe Dieudonne uzwi nka Prince Kid ukurikiranyweho ibyaha bifitanye isano n’Ihohoterwa rishingiye ku gitsina rikekwa ko ryakorewe bamwe mu bitabiriye irushanwa rya Miss Rwanda, yageze mu cyumba cy’iburanisha mu gitondo cyo kuri uyu Kane tariki 26 Gicurasi 2022.
Prince Kid yageze ku Cyicaro cy’Urukiko Rwisumbuye rwa Nyarugenge ruri i Nyamirambo ari mu modoka isanzwe itwara imfungwa n’abagororwa, yamabye impuzankano y’imfungwa n’abagororwa y’ibara ry’iroza yambarwa n’abatarakatirwa ndetse n’inkweto z’umukara n’amasogisi yirabura.
Mbere y’uko Umucamanza atangira kuburanisha uru rubanza rw’ubujurire ku ifungwa ry’agatetaganyo, Ubushinjacyaha bwongeye gusaba ko Urukiko Rwisumbuye rwa Nyarugenge rwaburanisha mu muhezo uru rubanza ku mpamvu z’uburemere bw’ibikubiye muri iyi dosiye nkuko rwaburanishijwe mu Rukiko rw’Ibanze rwa Kicukiro.
Me Nyembo Emelyne wunganira Prince Kid, yongeye kuvuga ko iki cyifuzo cy’Ubushinjacyaha kidafite ishingiro kuko no mu rubanza rubanza rwabaye mu muhezo ariko imyanzuro igasomerwa mu ruhame kandi ko iyi myanzuro yagarutse ku byaburaniwe mu muhezo bityo ko uwo muhezo ntacyo umaze.
No mu rubanza rubanza, Prince Kid n’Umunyamategeko we, bari banze ko rushyirwa mu muhezo bavuga ko uyu musore yatawe muri yombi bikamenyeshwa rubanda rwose bityo ko abantu bakwiye no kumenya ibiburanwaho.
Urukiko Rwisumbuye rwa Nyarugenge rumaze kumva impaka z’impande zombi, rwatesheje agaciro ubusabe bwa Prince Kid n’Umunyamategeko we bifuzaga kuburanira mu ruhame, rufata icyemezo ko urubanza ruburanishwa mu muhezo.
Prince Kid ukekwaho ibyaha birimo kwaka ishimishamubiri rishingiye ku gitsina bamwe mu bakobwa bitabiriye irushanwa rya Miss Rwanda, ku wa Mbere w’icyumweru gishize, yafatiwe icyemezo cyo gufungwa by’agateganyo aza kujuririra iki cyemezo.
Imwe mu mpamvu ikomeye yatumye uregwa afatirwa iki cyemezo, ni ibyagagaragajwe n’Ubushinjacyaha birimo ijambo ‘Happiness’ ryumvikanye mu majwi bikekwa ko ari Prince Kid abwira Miss Muheto ko yamukoreye ibishoboka n’ibidashoboka amwereka ko amukunda ariko ko yanze kumuha iyo ‘Happiness’, ryafashwe nk’irigaragaza ko yakaga ishimishamubiri rishingiye ku gitsina.
Uregwa n’umunyamategeko we bagaragaje impamvu batumye bajuririra iki cyemezo nk’aho bavuga ko Urukiko rwagereranyije ‘Happiness’ n’Ishimishamubiri rugenekereje kandi mu manza nshinjabyaha hatagomba kubamo kugenekereza.
Nanone kandi bagarutse ku kuba Urukiko rwaremeje ko kuba Ishimwe Dieudonne yarahamagaye Muheto Divine mu masaha akuze, bigaragaza guhoza undi ku nkeke kandi bigashimangira ubutumwa bugufi yamwandikiraga kenshi, bakavuga ko ibi bitagize impamvu zikomeye zo guhoza undi ku nkeke.
Uruhande rw’uregwa kandi ruvuga ko Urukiko rwirengagije ingwate y’umutungo utimukanwa n’uwimukanwa byatanzwe na Ishimwe Dieudonne kugira ngo arekurwe by’agateganyo akurikiranwe ari hanze, kandi ibyakozwe byose biri mu buryo Umushingamategeko yabiteganyije.
RADIOTV10
