Mashami Vincent wari umutoza mukuru wa Police FC, yemeje ko atazakomezanya n’iyi kipe nyuma y’imyaka itatu yari ayimazemo, ayishimira icyizere yamugiriye.
Mu butumwa Mashami Vincent yanyujije ku rubuga nkoranyambaga rwa X, yaciye amarenga ko atazakomezanya n’iyi kipe ya Polisi y’u Rwanda.
aagize Ati “Mfite ibyishimo bidasanzwe byuzuyemo amarangamutima, mu gihe ndi kubasezeraho mu gihe kingana n’imyaka itatu nari maze muri Police FC. Ndashimira ubuyobozi bwa Polisi y’u Rwanda bwangiriye icyizere bukananshyigikira kuva nagera hano muri iyi myaka yose. Ndifuriza ibyiza abafana b’ikipe.”
Iyi kipe ya Police FC yasoje umwaka ushize w’imikino iri ku mwanya wa kane muri Shampiyona y’u Rwanda, ndetse no ku mwanya wa gatatu mu Gikombe cy’Amahoro.
Mashami yabaye umutoza wa Police FC mu mpeshyi ya 2022, ayisigiye ibikombe bitatu birimo icy’Amahoro cya 2024 yatwaye atsinze Bugesera FC ku mukino wa nyuma ibitego 2-1, yatwaye kandi Igikombe cy’Intwari ndetse na Super Cup 2024.
Iyi kipe ya Police FC kandi, kuri uyu wa Mbere yagiye ishimira abakinnyi bayifashije mu mwaka w’imikino urangiye, igaragaza ko itazakomezanya na bo, ndetse n’uyu mutoza Mashami Vincent na bagenzi be.
Jean Claude KANYIZO
RADIOTV10
