Amafaranga yinjijwe n’u Rwanda avuye mu bucuruzi bw’amabuye y’agaciro muri 2023, yazamutseho 43%, kuko yageze kuri Miliyari 1,1 USD avuye kuri miliyoni 772 USD bwinjije muri 2022. Hagaragajwe ingano y’amabuye y’agaciro yacurujwe n’amafaranga yinjije.
Byatangajwe n’Ikigo cy’Igihugu gishinzwe Mine, Peteroli na Gaz (RMB) kuri uyu wa Kane tariki 15 Gashyantare 2023, cyagaragaje ko umusaruro w’ubucuruzi bw’amabuye y’agaciro wazamutse ku kigero cya 43,0%.
Iki kigo gitangaza ko izamuka ry’uyu musaruro w’ubucuruzi bw’amabuye y’agaciro, ryatewe n’impinduka zikomeje gushyirwa muri uru rwego, zirimo gukoresha ikoranabuhanga mu bucukuzi, ndetse no kongera ubunyamwuga muri uyu mwuga w’ubucukuzi bw’amabuye y’agaciro.
Iyi Raporo y’ Ikigo cy’Igihugu gishinzwe Mine, Peteroli na Gaz, igaragaza ingano y’amabuye y’agaciro yagiye acuruzwa n’u Rwanda hanze yarwo, ndetse n’amafaranga yagiye yinjiza.
Nko mu gihembwe cya kane cy’umwaka wa 2023, RMB igaragaza ko mu kwezi k’Ukwakira k’uwo mwaka, u Rwanda rwagurishije ibilo 1 015 bya Zahabu, yinjije Miliyoni 62,1 USD.
Byageze mu kwezi k’Ugushyingo 2023, ubu bwoko bw’amabuye y’agaciro bwa Zahabu, bwinjiriza u Rwanda miliyoni 52,9 USD, kuko habayeho igabanuka ry’ingano y’iyacurujwe, kuko muri uko kwezi hacurujwe ibilo 823.
Mu kwezi k’Ukuboza 2023, bwo u Rwanda rwacuruje hanze ibilo 1 320 bya zahabu, birwinjiriza 87 521 667 USD.
Andi mabuye nka Gasegereti yo, mu kwezi k’Ukwakira, yinjije Miliyoni 6,4 USD, yavuye mu bilo 431 035 byagurishijwe hanze, mu kwezi k’Ugushyingo hacuruzwa ibilo 416 231 byinjirije u Rwanda miliyoni 6,2 USD, mu gihe mu kwezi k’Ukuboza 2023 ubu bwoko bw’amabuye y’agaciro bwinjije miliyoni 6,9 USD, yavuye mu bilo 446 342 byacurujwe.
Naho amabuye ya Colta, mu kwezi k’Ukwakira 2023, hacurujwe ibilo 159 297, byaguzwe 6 907 161 USD, bigeze mu kwezi k’Ugushyingo, habaho igabanuka, kuko hacurujwe ibilo 128 887, byinjije 5 364 535 USD, na ho mu kwezi k’Ukuboza muri uwo mwaka wa 2023, Colta yacurujwe yinjirije u Rwanda 6 630 391 USD zaturutse mu bilo 180 393 byagurishijwe.
Hari kandi n’andi mabuye y’agaciro, nka Wolfram na yo yafashije u Rwanda kwinjiza amafaranga, nko kuba mu kwezi k’Ukuboza 2023, yarinjije 3 298 468 USD, yavuye mu bilo 274 493 byacurujwe muri uko kwezi.
RADIOTV10
