Mu rubanza ruburanishwa n’Urukiko Rukuru rwa Gitega mu Burundi ruregwamo abantu 16 baregwa ibikorwa byo kuryamana kw’abahuje ibitsina [abakunze kwitwa Abatinganyi] rwavutsemo impaka zishingiye ku barujemo bashya.
Aba bantu 16 bregwa muri uru rubanza, barimo abagabo n’abagore basanzwe bafite abo bashakanye, barimo 14 bakurikiranywe bafungiye muri Gereza Nkuru ya Gitega, mu gihe abandi babiri bari hanze.
Urubanza ntirwakomeje mu mizi yarwo kubera ko abandi bantu umunani baregwaga muri urwo rubanza rumwe batari bahari.
Urubanza rwabo mu mizi ntirwabashije kuba nyuma y’impaka zazamuwe n’abanyamategeko bunganira abaregwa, bavuga ko hari ibidasobanutse.
Bavuga kongera abandi bantu umunani muri uru rubanza byakozwe n’Ubushinjacyaha, bigamije gutinza nkana urubanza.
Abanyamategeko bavuze kandi ko batumva impamvu ubushinjacyaha bwongeyeho abandi bantu babiri muri urwo rubanza, bitewe n’uko batari bahari igihe cyo gutabwa muri yombi. Abantu 24 gusa ni bo batawe muri yombi muri Gashyantare umwaka ushize mu gace ka Rango muri Gitega.
Ubushinjacyaha bwagaragaje ko abantu umunani batari bahari batari bahamagawe. Ku birebana n’abantu babiri bongewe muri uru rubanza, umushinjacyaha wungirije yavuze ko bari mu bayobozi b’ishyirahamwe ‘Umuco’, ari bo uhagarariye mu mategeko akaba n’umubitsi waryo. Iri shyirahamwe ryari ryateguye amahugurwa ku bantu “bakurikiranyweho ubutinganyi” ku munsi batawe muri yombi.
RADIOTV10
