Uyu munsi ni kuwa Gatanu w’itariki ya 1 Ukwakira 2021, ni umunsi wa 274 mu minsi igize umwaka harabura iminsi 91 ngo umwaka urangire, Turi ku wa Gatanu wa 40 kuva 2021 yatangira Turi mu cyumweru cya 40 mu byumweru bigize umwaka wa 2021.
Ni bande bavutse ku munsi nk’uyu?
1.Niyomugabo Sunny (1990):
Yujuje imyaka 31, umunyarwanda ukina umukino w’intoki wa basketball muri Patriots BBC n’ikipe y’igihugu ubu akaba afasha ikipe ya Patriots mu mikorere yayo ya buri munsi (management).
Yavukiye i Goma yiga amashuli yisumbuye muri Essa Gisenyi, yanyuze mu makipe nka KBC, APR BBC na Patriots akinira kugeza ubu
Niyomugabo Sunny yatangiranye n’ishingwa rya Patriots BBC (2014), akaza kuyisohokamo yerekeza muri RP-IPRC-Huye BBC muri 2015, yongeye kuyigarukamo mu mwaka wa 2017.
2.George Weah (1966):
Yujuje imyaka 55,prezida wa Liberia, igihugu giherereye mu burengerazuba bwa Afrika, gusa mbere yo kuba prezida yakinnye umupira w’amaguru akaba ari nawe mu nyafrika umwe rukumbi watwaye Ballon d’or.
George Manneh Oppong Weah yatangiriye umupira w’amaguru muri Bong Range United y’iwabo muri Liberia, aca mu makipe nka Mighty Barrolle, Invincible Eleven, Africa sports na Tonnerre Yaoundé mbere y’uko mu 1988 agurwa na Arsène Wenger muri As Monaco yo mu Bufaransa, yayivuyemo ajya muri Paris Saint-Germain mu 1992 anatwarana nayo shampiyona y’1994 hanyuma aba uwatsinze ibitego byinshi muri Champions League y’1995.
1995 yasinyiye Milan AC, agiramo Ibihe byiza cyane ko mu myaka ine yatwaranye nayo shampiyona ebyiri, mu gusoza urugendo rwe rw’umupira w’amaguru we, yaje muri shampiyona y’u Bwongereza akinira Chelsea na Manchester City, agaruka mu Bufaransa akinira Marseille hanyuma ajya gusoreza umupira muri Al-Jazira muri 2003.
Uyu mugabo yatwaye ibihembo bitandukanye birimo Ballon d’or na Onze d’or yatwaye 1995,yatowe kandi nk’umukinnyI mwiza wa Afrika inshuro eshatu ( 1989, 1994, 1995]
Ikipe y’igihugu yayikiniye imikino 53 ayitsindira ibitego 14,uyu mugabo wakinaga aca ku mpande asatira yahisemo kwinjira muri politiki kuri ubu ni Perezida wa 25 wa Liberia kuva kuya 22 Mutarama 2018.
3.Mason Greenwood ( 2001)
Yujuje imyaka 20, Umwongereza ukina aca ku mpande asatira muri Manchester united no mu makipe mato y’u Bwongereza.
Mason Will John Greenwood umukino we wa mbere muri Manchester yawukinnye muri 2019, muri Europa League bahura na Astana yo muri Kazakhstan, aba umukinnyi ukiri muto utsindiye Manchester united ku myaka ye 17 n’iminsi 353.Kugeza ubu amaze gukinira Manchester United imikino 71 amaze kuyitsindira ibitego 20.
4.Júlio Baptista (1981)
Yujuje imyaka 40, uwahoze ari Rutahizamu wa Real Madrid n’ikipe y’igihugu ya Brazil.
Júlio César Clemente Baptista yanyuze mu makipe nka Sao Paulo, Sevilla, Real Madrid, Arsenal, AS Roma, Málaga, Cruzeiro, Orlando city na CFR Cluj
Ikipe y’igihugu ya Brazil yayikiniye imikino 47 ayitsindira ibitego bitanu.
5.Walter Mazzarri ( 1961)
Yujuje imyaka 60, Umutaliyani wahoze akina umupira w’amaguru kuri ubu akaba yari umutoza wa Torino baherutse gutandukana.
Walter Mazzarri yakiniye amakipe nka Pescara, Cagliari, Fiorentina n’ayandi.
Mu butoza yatoje amakipe menshi mato gusa muri 2007 yafashe Sampdoria,abifashijwemo n’ubufatanye mu busatirizi bwa Antonio Cassano na Giampaolo Pazzini yagejeje ikipe mu mikino ya UEFA Cup umwaka ukuriye ayigeza kuri final ya Copa Italia.
Yaje kwerekeza muri Napoli, ninawe wazanye uburyo bw’imikinire bwa 3-4-3, ikipe ya Napoli ikoresha, abifashijwemo n’inyabutatu ya ba Rutahizamu be Ezequiel Lavezzi, Edinson Cavani na Marek Hamšík muri 2011 yagejeje Napoli mu mikino ya Champions League bwa mbere, umwaka ukurikiye ayihesha igikombe baherukaga mu myaka 20 akaba yarayihesheje umwanya wa kabiri muri shampiyona umwanya mwiza Napoli yari igize mu myaka 20.
6.Mohamed Trézéguet (1994)
Yujuje imyaka 27, umukinnyi wo hagati w’umunya-Misiri ukinira Aston Villa n’ikipe y’igihugu ya Misiri.
Mahmoud Ahmed Ibrahim Hassan, bita Trézéguet izina yahawe n’umutoza we wo mu bwana nyuma yo kubona ko hari byinshi ahuje na David Trézéguet w’umufaransa, uyu musore yazamukiye muri Al Ahly y’iwabo yatangiye gukina mu ikipe nkuru afite imyaka 18 anayifasha kwegukana CAF Champions League ya 2012 n’iya 2013.
Muri 2015 yerekeje muri Anderlecht yo mu Bubiligi ntiyabasha guhita yigaragaza atizwa imyaka ibiri muri Mousclon na Kasimpasa yo muri Turkiya nyuma agurwa na Aston Villa akinira kugeza ubu.
Yatangiye akinira amakipe y’abato ya Misiri, yinjiye mu ikipe nkuru muri 2014 mu mukino wa gicuti bahuragamo na Kenya, kuri ubu amaze gukinira Misiri imikino 48 yayitsindiye ibitego birindwi
Ni bande bitabye Imana ku munsi nk’uyu?
1994 Bud Houser: Umunyamerika wakinaga imikino ngororamubiri, uyu yamamaye mu mikino Olempike cyane ko mu 1924, yatwaye umudali wa zahabu mu kujugunya ingasire no gutera intosho, hanyuma mu 1928 yegukana umudali wa zahabu Olempike mu kujugunya ingasire, yitabye Imana afite imyaka 93.
Ibihe by’ingenzi byaranze itariki nk’iyi mu mateka y’imikino itandukanye ku isi:
1661: hatangiye umukino wo gusiganwa mu mato, mu Bwongereza umwami Charles wa kabiri yatsinze murumuna we James, mu isiganwa ryavaga Greenwich rijya Gravesend.
1889: HFC Harlem, ikipe y’umupira w’amaguru yo mu Buholandi yarashinzwe, iyi kipe yegukanye shampiyona mu 1946, muri 2010 igira ibibazo by’ubukungu, ihitamo kwihuza na HFC Kennemerland, birangira ihindutseclub Haarlem Kennemerland.
1975: Mohamed Ali yisubije ikamba ry’uhiga abandi mu iteramakofe ry’abafite ibiro byinshi akubise Joe Frazier bisabye uduce 14, umurwano wabereye mu gace ka Quezon, i Manila mu cyo bari bise “The Thrilla in Manila”
1977: Imbere y’abafana ibihumbi 75, bari kuri Giants Stadium, umunya-Brazil Edison Arantes Donascimento “Pelé” yakinnye umukino we wa nyuma muri New York Cosmos, uyu mugabo bivugwa ko yatsinze ibitego 1,281 mu mikino 1,363.
1988: Umudagekazi Steffi Graf Yegukanye umudali wa zahabu Olempike muri Tennis atsinze Gabriela Sabatini amutsinze amaseti 2-0.
1988: Igitego cyo mu minota 30′ y’inyongera cya Yuri Savichev cyafasjij I Leta zunze ubumwe z’abasoviyete kwegukana Umudali wa zahabu Olempike mu mupira w’amaguru butsinze Brazil ibitego 2.
2000: Ubwo hasozwaga imikino Olempike ya 27 yabereye mu mujyi wa Sydney muri Australia, Juan Antonio Samaranch wari Prezida wa komite mpuzamahanga Olempike yavuze ko iyo ariyo mikino Olempike myiza ibayeho.
2000: Mu mikino Olempike yabereye i Sydney muri Australia, Leta zunze ubumwe za Amerika zasaruye imidali 97 harimo 40 ya zahabu.
2000: Mu mikino Olempike yabereye i Sydney, batatu ba mbere mu kwirukanka Marathon baje ari abanyafurika gusa, umunya-Ethiopia Gezahegne Abera yaje ku mwanya wa mbere akoresheje amasaha abiri, iminota 10′ n’amasegonda 11″ (2:10:11), akurikirwa n’umunya Kenya Erick Wainaina, mwenewabo w’umunya-Ethiopia aza ku mwanya wa Gatatu.
2000 : Ikipe y’igihugu ya Leta zunze ubumwe za Amerika y’umukino wa Basketball yegukanye umudali wa zahabu Olempike itsinze u Bufaransa amanota 85-75, Ray Allen na Vince Carter buri umwe yatsinze amanota 13.
Byateguwe na Esther Fifi Uwizera/RadioTV10 ku bufatanya na DSTV
