Minisiteri y’Ubuzima muri Tchad yatangaje ko nyuma yuko icyorezo cya Cholera kigeze mu nkambi y’Impunzi z’Abanya-Sudani iherereye mu Ntara ya Ouaddaï, iyi ndwara imaze guhitanwa abantu 63.
Uretse aba bahitanywe n’iki cyorezo, Minisiteri y’Ubuzima muri iki Gihugu cya Tchad, yatangaje ko abamaze kucyandura bageze kuri 938.
Impuguke n’imiryango mpuzamahanga irimo n’Ishami ry’Umuryango w’Abibumbye ryita ku Buzima (OMS) bari batanze impuruza ko Cholera ikomeje kwibasira Sudani ishobora no kwambukiranya imipaka. Ibyo byabaye impamo muri Nyakanga ubwo icyorezo cyageraga mu nkambi z’impunzi ziri mu burasirazuba bwa Tchad.
Mu nkambi ya Dougui iherereye mu Burasirazuba bwa Tchad icumbikiye impunzi zigera ku bihumbi 20, habawa abantu bane bahasize ubuzima mu kwezi gushize.
Ubuyobozi bwa Tchad buvuga ko bugiye kongera imbaraga mu bikorwa by’isuku n’isukura mu nkambi no mu baturage b’ako karere, hagamijwe gukumira ikwirakwira rya kolera.
Tchad ni kimwe mu Bihugu bikomeje kuremererwa n’ingaruka z’intambara yo muri Sudani yatangiye mu kwezi kwa Mata 2023. Kugeza ubu, impunzi zirenga ibihumbi 800 z’Abanya-Sudani zimaze guhungira muri icyo gihugu.
RADIOTV10
