Umuvangamiziki Shema Arnaud de Bosscher uzwi nka DJ Toxxyk, uherutse gufatirwa ibihano bitarimo igifungo ariko Ubushinjacyaha bukakijuririra, bwamusabiye gufungwa imyaka itanu, mu gihe mbere yari yasabiwe imyaka ibiri.
Uretse iki gihano cy’igifungo cy’imyaka itanu, Ubushinjacyaha bwasabiye DJ Toxxyk gutanga ihazabu ya 2 210 000 Frw.
Mu iburanisha ryo mu mizi rya mbere ryari ryabereye mu Rukiko rw’Ibanze rwa Nyarugenge ryabaye tariki 20 Mata 2026, Ubushinjacyaha bwari bwamusabiye igifungo cy’imyaka ibiri n’ihazabu ya miliyoni 1 Frw.
Tariki 04 Gicurasi, uru Rukiko rw’Ibanze rwa Nyarugenge, rwahamije uregwa ibyaha bine birimo icyo kwica umuntu atabigambiriye, icyaha kijyanye no gukoresha ibiyobyabwenge, ndetse n’icyaha cyo guhunga ahabereye impanuka, rumukatira igihano cyo gukora imirimo ifitiye Igihugu akamaro mu gihe cy’amezi atatu ariko asubitse mu gihe cy’amezi atandatu, ndetse gutanga ihazabu ya miliyoni 1,5 Frw.
Ubushinjacyaha butanyuzwe n’iki cyemezo, bwajuririye mu Rukiko Rwisumbuye rwa Nyarugenge, rwaburanishije urubanza rw’ubujurire uyu munsi ku wa Gatanu tariki 15 Gicurasi.
Ubushinjacyaha bwavuze ibihano byatanzwe n’urukiko rwaburanishije urubanza rwa mbere ari bito ugereranyije n’uburemere bw’ibyaha rwamuhamije.
Ubushinjacyaha buvuga ko Urukiko rutitaye ku ngaruka z’ibyaha byahamijwe uregwa ubwo rwafataga umwanzuro, buvuga ko hatitawe ku ntego z’ibihano, kuko biba binagamije gutanga isomo ku bandi, bityo ko ibihano yahawe bidashobora kugera kuri iyi ntego.
Bwavuze kandi ko Urukiko rutitaye ku biteganywa n’amategeko, aho bwifashishije zimwe mu ngingo z’amategeko zirimo iya 49 yo mu gitabo cy’Itegeko riteganya imiburanishirize y’imanza z’inshinjabyaha, ivuga ko Umucamanza atanga ibihano akurikije umuremere bw’ibyaha, ndetse n’ingaruka kimwe n’icyateye uregwa kubikora.
Ubushinjacyaha buvuga ko mu byaha byakozwe n’uregwa, harimo n’ibyatwaye ubuzima bw’umupolisi wari mu nshingano ze, bityo ko uregwa akwiye guhanishwa ibihano bitarimo inyoroshyacyaha nka birimo by’imirimo nsimburagifungo n’ihazabu.
Ni ho bwahereye busaba Urukiko Rwisumbuye rwa Nyarugenge guhanisha uregwa igifungo cy’imyaka itanu n’ihazabu ya 2 210 000 Frw.
Ni mu gihe uregwa we, yavuze ko yagaragaje kwicuza kandi ko ibyaha yakoze atari abigambiriye ndetse ko yanasabye imbabazi umuryango w’uriya mupolisi, bityo ko yumva ibihano yafatiwe binyuze mu mucyo.
Me Uwamahoro Marie Josée wunganira uregwa, yavuze ko ibihano byafashwe n’Urukiko rw’Ibanze rwa Nyarugenge, biteganywa n’itegeko, bityo ko ari byo bikwiye gukomeza guhabwa ishingiro.
Uyu Munyamategeko kandi avuga ko muri uru rubanza rw’ubujurire, Ubushinjacyaha bwasabye ibihano biremereye kurusha ibyari byasabwe mbere, dore ko yari yasabiwe gufungwa imyaka ibiri.
Urukiko rwapfundikiye urubanza rw’ubujurire, rukazasoma umwanzuro warwo mu cyumweru gitaha tariki 22 Gicurasi 2026.
RADIOTV10
