Ihuriro AFC/M23 rirwanya ibikorwa bibi by’ubutegetsi bwa Repubulika Iharanira Demokarasi ya Congo, ryatanze impuruza ku muryango mpuzamahanga, ku bitero biri kugabwa na FARDC ifatanyije n’abarimo FDLR, ingabo z’u Burundi n’abacancuro, biri gukoreshwamo intwaro za rutura.
Iyi mpuruza yatanzwe n’Umuvugizi wa AFC/M23 mu bya Politiki, Lawrence Kanyuka, wavuze ko abagize uruhande bahanganye rurimo FARDC, FDLR, Mai-Mai, Wazalendo, abacancuro, Imbonerakure n’ingabo z’u Burundi, bari kugaba ibitero mu bice bituwemo n’abo mu muryango w’Abanyamulenge.
Kanyuka yavuze ko “Kuva mu ijoro ryo ku ya 27 Kanama 2025, abahuzamugambi b’Ubutegetsi bwa Kinshasa [bagizwe n’abavuzwe haruguru] barashe mu buryo bwisukiranya mu bice bituwe n’abaturage bya Minembwe (Mikenke) na Kalehe (Katana, Kavumu, Katasomwa, Nyabibwe) no mu bice bihakikije.”
Umuvugizi wa AFC/M23 avuga ko uru ruhande bahanganye, muri ibi bitero rwakoresheje intwaro zikomeye zirimo indege zitagira abapilote nk’izizwi nka CH-4 na kamikaze, ndetse n’izindi mbunda za rutura.
Muri iri tangazo yashyize hanze kuri uyu wa Kane tariki 28 Kanama 2025, Lawrence Kanyuka yavuze ko kuva muri iryo joro ryo ku wa 27 hagabwa ibitero kugeza ejo, byari bigikomeje.
Kanyuka yavuze ko iri Huriro AFC/M23 ryahagurukiye kurwanya amabi yose akorwa n’uruhande bahanganye rwa Leta ya Congo Kinshasa, ridashobora kurebera aya marorerwa, ahubwo ko rigishyize imbere intego yaryo yo kurinda no kurwana ku baturage b’abasivile bugarijwe.
Abagize Umuryango w’Abanyamulenge, ni bamwe mu bakunze kwibasirwa n’imitwe ishyigikiwe n’ubutegetsi bwa Congo byumwihariko uwa FDLR ugizwe n’abasize bakoze Jenoside yakorewe Abatutsi mu Rwanda, ufatanyije n’igisirikare cya Leta ya kiriya Gihugu cya DRC, aho bakunze kwicwa bashinjwa ko ari Abanyarwanda kuko bavuga Ururimi rw’Ikinyarwanda.
RADIOTV10
