Ikipe ya Liverpool iyoboye urutonde rw’agateganyo rwa Shampiyona y’u Bwongereza, igiye kumara ibyumweru bitandatu ikina idafite umunyezamu wayo wa mbere Alisson Becker, kubera imvune.
Ni nyuma yo kugirira imvune yo mu bwoko bwa ‘Hamstring’ mu mukino ikipe ye yatsinzemo Crystal Palace igitego 1-0 ku ya 05 Ukwakira 2024.
Alisson Becker yavuye mu kibuga ku munota wa 79’, asimburwa n’Umunyezamu wa 3 Vítězslav Jaroš, dore ko Umunyezamu wa 2 wa Liverpool, Caoimhín Odhrán Kelleher, atagaragaye kuri uwo mukino kubera ikibazo cy’uburwayi.
Amakuru ava mu Bwongereza aravuga ko nibura uyu munyezamu w’Umunya-Brazil Alisson Becker azagaruka mu kibuga mu kwezi k’Ugushyingo 2024, akaba ashobora gusiba imikino 7 adakinira ikipe ye ya Liverpool.
Alisson Becker, mbere yo gusuzumwa n’abaganga bagasanga yagize imvune yo mu bwoko bwa ‘Hamstring’ yahise anakurwa ku rutonde ikipe y’Igihugu ya Brazil igomba kwifashisha mu mikino yo gushaka itike y’Igikombe cy’Isi cya 2026, bafite muri uku kwezi k’Ukwakira.
Arne Slot, Umuholandi utoza ikipe ya Liverpool, nyuma y’umukino wa Crystal Palace, yagize ati “Alisson birazwi ko ari we Munyezamu wacu wa mbere, umunyezamu w’umuhanga cyane ku Isi, rero birababaje kuri we no ku ikipe yacu kuba yavunitse, gusa dufite andi mahitamo y’umunyezamu wa kabiri, kandi na we ni umuhanga, Caoimhín Kelleher yamaze kubyerekana, ni yo mpamvu ari we Munyezamu wacu wa kabiri, kandi ubwo Alisson aheruka kuvunika, n’ubundi nakinishije Caoimhín Kelleher.”
Imikino ishobora kutagaragaramo Alisson Becker, irimo n’ikomeye izahuza iyi kipe ye ya Liverpool iri guhabwa amahirwe yo kuzitwara neza muri uyu mwaka w’imikino irimo izayihuza na Chelsea, Arsenal na Brighton, iyi yo bakaba bazanahura muri Carabao Cup.
Alisson Becker azanasiba umukino bazahuramo na Aston Villa muri Shampiyona ndetse n’indi mikino ibiri ya UEFA Champions League bazahuramo na RB Leipzig ndetse na Bayer Leverkusen.
Cedrick KEZA
RADIOTV10
