Umugaba w’ingabo za Uganda, akaba n’umuhungu wa Perezida Yoweri Museveni uherutse kongera gutorerwa kuyobora igihugu, yatangaje ko abashyigikiye ishyaka ritavuga rumwe n’ubutegetsi barenga 30 bishwe, abandi basaga 2 000 batawe muri yombi nyuma y’amatora.
Ni mu gihe Bobi Wine uyobora ishyaka ritavuga rumwe n’ubutegetsi akomeje kuba mu bwihisho, nyuma yo gushinja inzego z’umutekano kugaba igitero mu rugo rwe, nyuma y’amatora yo ku wa 15 Mutarama 2026, yise ko yabayemo ubujura bukabije, anasaba abaturage kwigaragambya.
Nk’uko byatangajwe na Komisiyo y’Amatora, Museveni w’imyaka 81 yatsinze amatora yegukana 72% by’amajwi, mu gihe Bobi Wine yabonye 25%. Abakurikiranye amatora bo muri Afurika n’imiryango mpuzamahanga itegamiye kuri Leta banenze ihonyorwa rikabije ry’abatavuga rumwe n’ubutegetsi ndetse n’ihagarikwa rya murandasi (internet) ryabaye muri ayo matora.
Abinyujije ku rubuga rwa X, Umugaba Mukuru w’ingabo Muhoozi Kainerugaba yagize ati: “Twafunze abantu barenga 2,000 b’impirimbanyi za Kabobi (Bobi Wine) yatekerezaga ko ashobora gukoresha.”
Mu bafashwe mu minsi ishize harimo n’umudepite w’ishyaka ritavuga rumwe n’ubutegetsi, Muwanga Kivumbi, uhagarariye Akarere ka Butambala mu burengerazuba bwo hagati bwa Uganda, ahavuzwe ihohoterwa rikomeye cyane ku munsi w’amatora.
Kivumbi yabwiye itangazamakuru rya AFP ko inzego z’umutekano zishe abantu icumi bo mu bakozi be, nyuma yo gutera iwe mu rugo, mu gihe polisi yo ivuga ko abamushyigikiye barashwe ubwo bageragezaga gutwika ahabarurirwa amajwi na sitasiyo ya polisi.
Umwunganizi mu mategeko wo mu batavuga rumwe n’ubutegetsi yabwiye itangazamakuru rya AFP ko kugeza ku wa Gatatu w’iki cyumweru, abantu barenga 600 bari bamaze gutabwa muri yombi mu myigaragambyo yakurikiye amatora.
Me Erias Lukwago yagize ati: “Mu manza zose, abakiliya bacu bahakana ibyaha baregwa. Bamwe bavuga ko polisi yabafatiye mu ngo zabo ikabafunga mbere y’uko bagezwa mu rukiko, ku byaha batari bazi.”
Shemsa UWIMANA
RADIOTV10
