Ubushinjacyaha bwagejeje Miss Muheto Nshuti Divine imbere y’Urukiko rw’Ibanze rwa Kicukiro, bwasobanuye uko ibyaha biregwa uyu mukobwa wabaye Nyampinga w’u Rwanda, byakozwe, busaba Umucamanza kumuhamya ibyaha no kumuhanisha ibihano birimo gufungwa n’ihazabu y’Ibihumbi 220Frw.
Ni mu iburanisha ku ifungwa n’ifungurwa by’agateganyo ryabereye mu Rukiko rw’Ibanze rwa Kicukikoo ryabaye mu gitondo cyo kuri uyu wa Kane tariki 31 Ukwakira 2024.
Muheto Nshuti Divine wabaye Miss Rwanda wa 2022, akurikiranyweho gutwara ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga agira, ndetse no kugonga no kwangiza ibikorwa remezo, hamwe no guhunga nyuma yo kugonga.
Ubushinjacyaha bugaragariza Umucamanza impamvu bushingiraho busabira Muheto Divine gukurikiranwa afunze, bwasobanuye uko yakoze ibyaha akurikiranyweho.
Ubushinjacyaha bwavuze ko mu ijoro yakoreyemo ibi byaha, yari yabanje kunywera mu Kagari ko mu Mujyi wa Kigali kitwa Atelier du vin, akageza saa sita z’ijoro, ari na bwo yuriraga imodoka agataha.
Bwavuze ko kubera gutwara ikinyabiziga atabifitiye uruhushya ndetse nta n’ubumenyi buhagije abifitiye, ndetse no kuba yari yanyoye ibisindisha, ari bwo ubwo yari atwaye imodoka, yataye umuhanda akagonga ibikorwa remezo birimo ipoto y’amashanyarari n’umukindo wo ku muhanda.
Ntibyagarukiye aho kandi, kuko yahise ahunga, ariko akaza kugaruka aje kureba ibikoresho yari yasize mu modoka ye birimo telefone, agasanga abapolisi bashinzwe umutekano wo mu muhanda bahageze, akabanza no guhakana ko ari we wari utwaye iki kinyabiziga.
Ubushinjacyaha buvuga ko kandi atari ubwa mbere yari akoze ibi byaha, bwavuze yapimwe igipimo cy’umusemburo mu mubiri we, hagasangwamo 4,00 mu gihe umuntu atemerewe gutwara yarengeje 0,8.
Uregwa waburanye yunganiwe n’abanyamategeko batatu, ntiyahakanye ibyaha ashinjwa, yavuze ko yatwaye ikinyabiziga yanyoye ibisindisha. Ati “Nemera gutwara nasinze, gutwara nta ruhushya no kugonga.”
Gusa yahakanye icyaha cyo kwangiza ibikorwa remezo, ndetse n’Umwe mu banyamategeko be arabishimangira, avuga ko yaba ipoto y’amashanyarari ndetse n’umukindo bivugwa ko yagonze, bigihagaze.
Umunyamategeko kandi yavuze ko kuba uregwa ataragoye inzego z’ubutabera mu mabazwa ye ya mbere, ndetse akaba yemera ibyo yakoze akanabisabira imbabazi, akwiye koroherezwa.
Ubushinjacyaha bugaragaza icyifuzo cyabwo, bwasabye Umucamanza ko yahamya ibyaha uregwa ubundi ahanishwa igifungo cy’amezi atandatu n’ihazabu y’ibihumbi 180 Frw ku cyaha cyo gutwara ikinyabiziga yasinze, ndetse n’igifungo cy’amezi abiri n’ihazabu y’ibihumbi 10 Frw ku cyaha cyo gutwara adafite uruhushya rwo gutwara ibinyabiziga.
Ku cyaha cyo guhunga nyuma yo guteza impanuka, Muheto Nshuti Divine yasabiwe gufungwa umwaka umwe n’ihazabu y’ibihumbi 30 Frw. Byose hamwe, uregwa yasabiwe gufungwa umwaka umwe n’amezi umunani, no gutanga ihazabu y’ibihumbi 220 frw.
Umucamanza amaze kumva ibisobanuro by’impande zombi, yahise apfundikira urubanza, yanzura ko umwanzuro w’Urukiko uzasomwa mu cyumweru gitaha, tariki 06 Ugushyingo 2024.
RADIOTV10
