Rutahizamu Kylian Mbappé wamaze kwerekanwa mu ikipe ya Real Madrid yo muri Espagne, asize ibigwi muri Paris Saint Germain yari amazemo imyaka itandatu.
Ikipe ya Real Madrid iherutse kwegukana igikombe cya UEFA Champions League, ikomeje kwiyubaka, dore ko nyuma y’umunsi umwe gusa yahise yerekana uyu rutahizamu w’Umufaransa.
Mbappè w’imyaka 25 yerekeje muri Real Madrid avuye muri PSG mu Bufaransa aho yari amaze kuyikinira imikino 308 ndetse anayitsindira ibitego 256 mu myaka itandatu yari ayimazemo.
Uyu rutahizamu yasinye amasezerano y’imyaka itanu azamugeza muri 2029, aho yanemeye kugabanya ku mushahara we.
Bivugwa ko uyu mukinnyi yahembwe miliyoni 63,9 z’Ama-Pounds mu mwaka we wa nyuma harimo n’agahimbazamusyi ka miliyoni 25 ku mwaka.
Muri Real Madrid, Mbappe azajya ahembwa miliyoni 12,8 z’amapawundi ku mwaka havuyemo imisoro.
Mbappè yakuriye mu ikipe ya Monaco y’abato, aza kuzamuka mu ikipe nkuru ndetse anatwarana na yo Shampiyona y’Abafaransa, ari na ho PSG yamukuye.
Jean Claude KANYIZO
RADIOTV10
