Iran yatangaje ko yagabye ibitero ku birindiro by’ingabo za Leta Zunze Ubumwe za America muri Bahrain, Jordan na Iraq, mu rwego rwo kwihorera ku bitero bya Amerika byahitanye abantu 11, barimo batanu bari mu birori by’ubukwe.
Leta Zunze Ubumwe za America yagabye ibitero bishya ku bice byo mu majyepfo ya Iran, bituma Iran na yo isubiza igaba ibitero ku birindiro by’ingabo za Amerika muri Bahrain, Jordan na Iraq, mu gihe amakimbirane ku bijyanye n’Inzira y’Amato ya Hormuz akomeje gukaza umurego.
Ibi bitero byabaye mu rukerera rwo kuri uyu wa Gatatu, bikaba ari byo bibaye bikomeye mu guhangana gukomeye hagati ya Amerika na Iran mu gihe kirenga ukwezi.
Kuwait na yo yatangaje ko ingabo zayo zirinda ikirere zahanganye n’indege zitagira abapilote n’ibisasu bya misile byaturutse muri Iran.
Ubuyobozi bw’ingabo za Amerika zishinzwe ibikorwa byo mu Burasirazuba bwo Hagati (CENTCOM), bwatangaje ko bwagabye ibitero ku “birindiro bya gisirikare bya Iran”, nyuma y’uko Ingabo zidasanzwe za Iran (IRGC) zigerageje kugaba ibitero ku ngabo za Amerika ndetse n’amato atwara ibicuruzwa mu Nzira y’Amato ya Hormuz.
CENTCOM yavuze ko mu byibasiwe harimo ibirindiro birinda ikirere bya Iran, ibyuma bya radar, ibikoresho byo mu mazi, ubushobozi bwo gushyira za mine mu nyanja ndetse n’ibikorwaremezo by’itumanaho.
Itangazamakuru ryo muri Iran ryatangaje ko ibitero byibasiye Sirik, Konarak, Bandar Abbas, Jask, Asaluyeh na Ahvaz, ndetse n’ikirwa cya Qeshm.
Umuvugizi wa Minisiteri y’Ububanyi n’Amahanga ya Iran, Esmaeil Baghaei, yavuze ko kimwe mu bitero “by’ubugome” cyibasiye inzu yari irimo imiryango yari yateraniye mu birori by’ubukwe i Kuhestak.
Amakuru yatangajwe n’itangazamakuru ryo muri Iran avuga ko abantu nibura batanu, barimo umwana, bahasize ubuzima, abandi 63 barakomereka.
Ikigo cy’itangazamakuru cya Leta ya Iran, IRNA, cyatangaje ko abantu abandi barindwi bishwe, abandi umunani bagakomereka mu bitero bya misile za Amerika byibasiye ahantu hatatu mu ntara ya Khuzestan.
Iran yagabye ibitero ku birindiro bya Amerika
Ingabo zidasanzwe za Iran (IRGC) zavuze ko zasubije igitero cyabereye i Kuhestak, zigaba igitero cya misile ya ballistic ku kigo cya Camp Titin, ikigo cy’ingabo za Amerika zo mu mazi giherereye hafi y’Ikigobe cya Aqaba muri Jordan.
Iran kandi yavuze ko yibasiye ibirindiro by’ingabo bizwi nka Prince Hassan muri Jordan, aho ngo yari igamije ahabikwa indege zitagira abapilote zo mu bwoko bwa RQ-4 na MQ-9.
Tehran yavuze ko indege nyinshi zasenywe ndetse n’abasirikare ba Amerika benshi bakahasiga ubuzima, ariko Al Jazeera ntiyashoboye kwigenga kugenzura aya makuru.
Ingabo za Jordan zatangaje ko zahanuye misile 10 muri 13 zarashwe kuri icyo gihugu, mu gihe izindi misile eshatu zagwiriye ahantu hadatuwe.
Ku ruhande rwa Amerika, umukozi wo muri Leta ya Amerika yabwiye Al Jazeera ko nta muntu wakomerekeye mu kigo cya Camp Titin kandi ko nta byangiritse bikomeye byahabaye.
Bahrain na yo yibasiwe
Ingabo za Iran zavuze ko zarashe indege zitagira abapilote ku bikoresho bya radar ndetse no ku bice by’ikigo cy’ingabo cya Sheikh Isa muri Bahrain, ahantu Tehran ivuga ko ingabo za Amerika zibarizwa.
Minisiteri y’Ubutegetsi bw’Igihugu ya Bahrain yasohoye ubutumwa bwinshi isaba abaturage kujya mu buhungiro no kwirinda ahantu hashobora kuba ibitero.
Nyuma yaho, IRGC yatangaje ko yagabye igitero gikomatanyije cya misile n’indege zitagira abapilote ku bikorwaremezo bya Amerika mu ntara ya Erbil, mu majyaruguru ya Iraq.
Iran yavuze ko ibyo bitero byasenye ikigo cyo gusana ibikoresho n’ububiko bw’ibikoresho bya tekiniki, ndetse ko byateje inkongi mu bigega bibikwamo lisansi.
Kuwait na yo yatangaje ko uburyo bwayo bwo kurinda ikirere bwakumiriye “indege zitagira abapilote na misile by’abanzi” byarashwe na Iran. Kugeza ubu, Tehran ntacyo yari yatangaza ku birego bya Kuwait.
Ibi bitero bibaye mu gihe umwuka mubi hagati ya Amerika na Iran ukomeje kwiyongera, cyane cyane ku bijyanye n’umutekano w’Inzira y’Amato ya Hormuz, imwe mu nzira z’ingenzi ku isi zitwarwamo peteroli n’ibindi bicuruzwa.
RADIOTV10