Menya Umuhanzi uhagarariye u Rwanda mu irushanwa rikomeye i Burayi ‘Prix Découvertes’

Uwase Bukuru Christiane uzwi nka Boukuru, yagaragaye ku rutonde rw’abahanzi 10 bahagarariye Ibihugu byabo mu irushanwa ry’umuziki rizwi nka ‘Prix Découvertes RFI’ rya 2025.

Ni urutonde rwatangajwe kuri uyu wa Kabiri tariki 28 Mutarama 2025 na Radio Mpuzamahanga y’Abafaransa RFI isanzwe itegura iri rushanwa.

Abagaragaye kuri uru rutonde uko ari 10, banyuze mu magerageza atandukanye kuva tariki 20 Ugushyingo 2025, nyuma hakorwa igenzura ryemeza ko ari bo batsinze.

Muri byinshi byashingiweho, harimo icy’umwihariko ari cyo cy’uburyo umukandida asobanura ibihangano bye n’Igihugu cye ndetse n’uko yiteguye mu gihe yaba atsindiye iri rushanwa.

Abahanzi 10 bahatanye ni Boukuru (Rwanda), Gregory Laforest (Haiti); DINA M (Madagascar), Jenny Paria (DRC), Joyce Babatunde (Cameroon), Queen Rima (Guinea), Seepage (DRC), Sahad (Senegal), Straiker (Guinea), ndetse na Yewhe Yeton (Benin).

Boukuru aherutse gushyira ku isoko Album ye ya mbere yise ‘Gikundiro’, ifite umwihariko wo kuba iriho indirimbo ze gusa nta w’undi muhanzi bafatanyije.

Yagiye abona amahirwe yo kuririmba mu bitaramo bikomeye. Mu kwezi k’Ukuboza 2023, uyu mukobwa yaririmbye mu iserukiramuco ‘Flytime Fest’ ryabereye mu Gihugu cya Nigeria.

Ni iserukiramuco ryabaye ku wa 21 kugeza ku ya 25 Ukuboza 2023, ryaririmbyemo abarimo Davido, Asake, Fireboy, Kizz Daniel, Iyanya, Lil Durk, Mayorkun, Spyro n’abandi bakomeye.

Boukuru yaririmbye mu gitaramo cyabaye ku wa 23 Ukuboza 2023, icyo gihe yaririmbye nyuma ya Kizz Daniel.

Album uyu mukobwa yasohoye iriho indirimbo nka ‘Ndakubona’, ‘Gikundiro’ yitiriye Album, ‘Umwana iyi nganzo’, ‘Ntacyo Mbaye’, ‘Wintoteza’, ‘Umwali’, ‘Ndagukunda’, ‘Whew!’, ‘Gukura’, ‘Experience’ ndetse na ‘Nishimira’ nk’inyongezo (Bonus Track) yashyize kuri iyi Album y’indirimbo 10.

RFI yavuze ko kugeza ku wa 16 Gashyantare 2025, abafana bashyiriweho uburyo bwo gutora binyuze kuri Internet, bagahesha amahirwe uwo bashaka ko azatsinda.

Umuhanzi uzatsindira Prix Découvertes RFI y’uyu mwaka azatangazwa ku wa 18 Gashyantare 2025.

‘Prix Découvertes RFI’ itegurwa ku bufatanye na Sacem, Institut Français, Umuryango Mpuzamahanga w’Abavuga Igifaransa na Unesco.

Kuva iri rushanwa ryatangira kuba rimaze kwegukanwa n’abarimo Tiken Jah Fakoly (Côte d’Ivoire), Rokia Traoré (Mali), Didier Awadi (Sénégal), Amadou na Mariam (Mali), Maurice Kirya (Uganda) na Soul Bang’s (Guinée), King Lesh (2021), Waye (2020), Céline Banza (2019) n’Umunyarwanda nyakwigendera Yvan Buravan (2018).

Umuhanzi utwaye iki gihembo ategurirwa ibitaramo bikomeye mu Bihugu bitandukanye byo ku Mugabane wa Afurika akanakorera igitaramo i Paris mu Bufaransa.

Uretse guhabwa igihembo, anagenerwa amayero 10 000 [Ni ukuvuga asaga Miliyoni 12 Frw].

Mu 2021, u Rwanda rwahagarariwe na Kaya Byinshi, muri 2020 hagerageza Mike Kayihura, mu gihe Social Mula yahatanye muri iri rushanwa mu 2019.

Felix NSENGA
RADIOTV10