Ishyirahamwe ry’Umukino wa Volleyball mu Rwanda (FRVB) ryatangaje ko bitewe n’impamvu ridashobora kugira icyo rihinduraho, irushanwa ryo Kwibuka ryari riteganyijwe kuva tariki 06 Kamena, ryasubitswe rikigizwa inyuma ho ibyumweru bibiri.
Iri rushanwa ryo Kwibuka (Genocide Memorial Tournament) ryari riteganyijwe kuba tariki 06, iya 07 n’iya 08 Kamena 2025 mu Mujyi wa Kigali, ryimuriwe tariki 20, iya 21 n’iya 22 Kamena.
Ishyirahamwe ry’umukino wa Volleyball mu Rwanda, rivuga ko iri rushanwa ryimuwe “ku mpamvu zirenze ubushobozi buri mu byo twabasha kugenzura.” Rikaboneraho kwisegura ku bw’ingaruka zishobora guterwa n’izi mpinduka zibaye bitunguranye.
Itangazo ryimura iri rushanwa, ryagiye hanze kuri uyu wa Mbere tariki 02 Kamena 2025 habura iminsi itatu gusa ngo ritangire, ndetse rikaba ryari ryatumiwemo amakipe yo hanze y’u Rwanda, nk’ayo muri Kenya na Uganda, ndetse amwe akaba yari yaramaze kugera i Kigali.
Iri rushanwa ‘Genocide Memorial Tournament’ ni ngarukamwaka, aho riba rigamije kuzirikana no guha icyubahiro abari abakinnyi, abatoza ndetse n’abandi bose babarizwaga mu mukino wa Volleyball bishwe muri Jenoside yakorewe Abatutsi.
Iry’umwaka ushize wa 2024, ryegukanywe n’Ikipe ya Police VC mu bagabo nyuma yo gutsinda Gisagara VC, mu gihe mu bagore ryari ryatwawe na APR WVC ubwo yatsindaga RRA WVC.
RADIOTV10
