Ubuyobozi bwa Rayon Sports bwatangaje umutoza mukuru mushya w’iyi kipe, ari we Umunya-Tunisia Afahmia Lotfi watozaga ikipe ya Mukura VS, buboneraho kwizeza abakunzi b’iyi kipe bahimba ‘Gikundiro’ ko igiye kwegukana ibikombe.
Byemejwe n’Ubuyobozi bwa Rayon Sports mu itangazo bwashyize hanze kuri uyu wa Gatanu tariki 30 Gicurasi 2025, nyuma yuko byari byatangiye kunugwanugwa.
Iri tangazo rigira riti “Association Rayon Sports ishimishijwe no gutangaza ko Umunya-Tuniziya AFHAMIA LOTFI yagizwe Umutoza Mukuru mushya wa Rayon Sports FC.”
Nyuma yo kumwakira, Perezida wa Rayon Sports, Thaddée Twagirayezu, yahamije ko bagiye gufatanya kubaka iyi kipe igatwara ibikombe.
Yagize ati “Turifuza Rayon Sports nshya itwara ibikombe, ishingiye ku mbaraga, icyerekezo no kwitwara neza. Abafana bacu bitegure ikipe ibatera ishema kandi ifite intego, ikipe ihatana mu marushanwa y’imbere mu Gihugu no muri CAF Confederation Cup.”
Nyuma yo gusoza umwaka w’imikino wa 2024-2025, Perezida Twagirayezu yakomeje agira ati “Tuboneyeho no kubamenyesha ko RAYON SPORTS DAY (UMUNSI W’IGIKUNDIRO 2025) izaba ku nshuro ya 6. Ibi birori bizabera i Kigali hagati ya tariki ya 26 Nyakanga na 9 Kanama 2025. Uyu munsi uzatumikirwamo n’ikipe y’ubukombe muri Afurika.”
Rayon Sports ikomeje urugamba rwo kwitegura umwaka w’imikino utaha, kandi iri gusoza ibiganiro n’abafatanyabikorwa bashya, bazatangazwa mu minsi iri imbere.
Aime Augustin
RADIOTV10
