Manchester United ikomeje kwiyubaka mu rwego rwo kwitegura umwaka w’imikino mushya, yinjije umukinnyi w’umusatirizi Rasmus Hojlund imuguze miliyoni 72 z’Ama-Pounds.
Umutoza Erik teen Hag, utarigeze ashimirwa ubusatirizi bwe mu mwaka w’imikino urangiye, akomeje kubaka ubu busatirizi, aho ubu yinjije uyu mukinnyi ukomoka muri Denmark.
Kuri miliyoni 72 Pounds zaguzwe uyu mukinnyi, Manchester United yabanje kwishyura miliyoni 64, mu gihe andi miliyoni 8 azaza ari inyongera bitewe n’uko azitwara.
Rasmus Hojlund azasinya amasezerano y’imyaka 5 mu mashitani atukura nyuma yo gusezera kuri bagenzi be bakinanaga muri Atalanta mu gikorwa cyabaye mu mpera z’icyumweru twaraye dusoje.
Uyu musore wimyaka 20 yinjiye muri Atalanta mu mpeshyi ishize aho yaguzwe miliyoni 14.5 z’Ama-Pound avuye mu ikipe Sturm Graz.
Hojlund watsinze ibitego icyenda muri Serie A, azaba abaye uwa gatatu usinyishijwe muri Man United, nyuma ya Mount wavuye muri Chelsea, aguzwe miliyoni 60 Pounds ndetse na Andre Onana wavuye muri Inter Milan, we waguzwe miliyoni 47 Pounds.
Jimmy NDAYIZIGIYE
RADIOTV10
